கஞ்சா விற்பனை செய்த மேற்கு வங்க மாநிலத்தவர் கைது!

நாகர்கோவில்: ஆரல்வாய்மொழி அருகே கஞ்சா விற்பனை செய்து வந்த மேற்கு வங்க மாநிலத்தைச் சேர்ந்தவரை, செங்கல் சூளை உரிமையாளர் பிடித்து காவல் துறையினரிடம் ஒப்படைத்த சம்பவம் பரபரப்பை ஏற்படுத்தியுள்ளது.

கன்னியாகுமரி மாவட்டத்தில் அண்மைக் காலமாக போதை ஊசி மருந்துகள், கஞ்சா ஆகியவை பள்ளி மற்றும் கல்லூரி மாணவர்களுக்கு விற்பனை செய்யும் சட்டவிரோதமான சம்பவங்கள் அதிகரித்ததாகக் கூறப்படுகிறது.

கல்வி நிலையங்கள் அருகிலேயும், பேருந்து நிலையங்களிலும் அடையாளம் தெரியாத நபர்கள் போதைப் பொருட்களை சர்வ சாதாரணமாக விற்பனை செய்வதாகப் புகார்களும் எழுந்தன. இதனைக் கண்டுபிடிக்க காவல் துறையினருக்கு பெரும் சவாலாக உள்ளது.

ஆரல்வாய்மொழி சுற்றுவட்டாரப் பகுதிகளில் நூற்றுக்கும் மேற்பட்ட செங்கல் சூளைகள் இயங்கி வருகின்றன. இதில் வட மாநிலங்களைச் சேர்ந்த ஏராளமானோர் பணி புரிகின்றனர். அதில் மேற்கு வங்காளத்தைச் சேர்ந்த சமரோஜீட் பிஸ்வாஸ் (வயது 33) என்ற இளைஞர், அங்கு பணி புரிந்து வந்திருக்கிறார். இந்நிலையில் அவர் அப்பகுதியில் யாருக்கும் தெரியாமல் கஞ்சா செடிகளையும் வளர்த்து பாதுகாத்து வந்திருக்கிறார்.

இவரிடம் இருந்து கஞ்சா வாங்க தினசரி ஏராளமான இளைஞர்கள் வருவதைப் பார்த்து, சந்தேகம் அடைந்த செங்கல் சூளை உரிமையாளர் ஆரல்வாய்மொழி காவல் நிலையத்தில் தகவல் கொடுத்து உள்ளார். அதன் அடிப்படையில் காவல்துறையினர் சமரோஜீட் பிஸ்வாஸைக் கைது செய்தனர்.

அதையடுத்து அப்பகுதியில் அவர் வளர்த்து வந்த கஞ்சா செடிகளையும் அழித்தனர். மேலும் வழக்குப் பதிந்த காவல் துறையினர் அவரிடம் 'வேறு எங்கு எல்லாம் கஞ்சா செடி வளர்த்துள்ளார்? கூட்டாகச் சேர்ந்து கஞ்சா விவசாயம் மற்றும் விற்பனை தொழில் நடத்தப்பட்டு வருகிறதா?' என்ற கோணங்களில் விசாரணை செய்து வருகின்றனர்.

இதையும் படியுங்க: 462 ஏக்கர் பரப்பளவில் பயிரிடப்பட்டிருந்த கஞ்சா செடிகள் அழிப்பு!