கன்னியாகுமரி மாவட்டத்தின் மேற்குத் தொடர்ச்சி மலைப் பகுதிகளில் புலி, சிறுத்தை, கரடி, யானை, கடமான் உள்ளிட்ட ஏராளமான வன விலங்குகள் வாழ்ந்துவருகின்றன. மேற்குத் தொடர்ச்சி மலையை சார்ந்துள்ள கிராம பகுதிகளில் ஆரல்வாய்மொழி, குமரி - நெல்லை மாவட்டத்தின் எல்லைப் பகுதியாகும்.
ஆரல்வாய்மொழி, அதன் சுற்றுவட்டாரப் பகுதிகளில் இரண்டு ஆயிரத்திற்கும் மேற்பட்ட காற்றாலைகள் இயங்கிவருகின்றன. தற்போது, காற்று மூலம் மின் உற்பத்தி செய்யும் சீசன் என்பதால், ஆங்காங்கே உள்ள காற்றாலைகளில் மின் உற்பத்தி கணக்கெடுக்கும் பணிகளில் ஊழியர்கள் தீவிரமாக ஈடுபட்டு வருகின்றனர்.
இந்நிலையில், ஆரல்வாய்மொழியின் மூவேந்தர் நகர் பகுதியில் மூன்று நாட்களுக்கு முன்பு, காவலாளி ஒருவர் இரவு ரோந்து பணியில் ஈடுபட்டிருந்தார். அப்போது, கண்ணெதிரே சிறுத்தைப் புலி ஒன்று தரையில் படுத்து கிடந்ததைக் கண்டு ஓட்டம் பிடித்து அலுவலகத்துக்குள் நுழைந்து அதிஷ்டவசமாக உயர்தப்பினார்.
இதேபோல், ஆரல்வாய்மொழி பகுதியைச் சேர்ந்த ஐயப்பன் என்பவர் நேற்று அந்த பகுதியில் ரீடிங் எடுப்பதற்காக இருசக்கர வாகனத்தில் சென்றுள்ளார். அப்போது, சுமார் 100 மீட்டர் தூரத்தில் சிறுத்தைப் புலி ஒன்று அவரை நோக்கி வந்து கொண்டிருந்ததைப் பார்ந்து அவருக்கு தூக்கி வாரிப்போட்டது. இதில் சுதாரித்துக் கொண்ட ஊழியர் இருசக்கர வாகனத்தில் அதிவேகமாக அலுவலகம் அடைந்து உயிர்பிழைத்தார்.
இந்த சம்பவங்களால், காற்றாலை ஊழியர்கள் மட்டுமல்லாமல் அக்கம் பக்கத்து கிராம மக்களும் பீதி அடைந்துள்ளனர்.
ஆரல்வாய்மொழியில் வன சரக அலுவலகம் இருந்தும் கூட வனத்துறையினர் இதனை கண்டுகொள்ளவில்லை என பொதுமக்கள் குற்றம்சாட்டுகின்றனர். வன விலங்குகள் காடுகளில் இருந்து வெளியேறி ஊருக்குள் வருவதை தடுக்க நடவடிக்கை எடுக்க வேண்டும் என அவர்கள் கோரிக்கை விடுத்துள்ளனர்.
