காஞ்சிபுரம்: வாலாஜாபாத் துணை மின் நிலையத்தில் ஊத்துக்காடு பகுதியைச்சேர்ந்த மோகன்ராஜ் என்பவர் வயர்மேனாக பணியாற்றி வருகின்றார். 46 வயதான மோகன்ராஜிற்கு காஞ்சனா என்ற மனைவியும் இரண்டு மகள்களும் உள்ளனர்.
இந்நிலையில் நேற்று நள்ளிரவு அரசு மதுபானக்கடை அருகே உள்ள மின் கம்பத்தின் மீது சாலை விரிவாக்கப்பணிக்கு சென்ற ஆர் ஆர் இன்ஃபிரா சொல்யூசன் நிறுவனத்தின் கனரக லாரி ஒன்று மோதியதில் மின்கம்பம் சாய்ந்து மின் தடை ஏற்பட்டது.
மின்வாரிய அலுவலகத்தில் நைட் டூட்டி செய்யும் மின்வாரிய ஊழியர்கள் சம்பவ இடத்துக்கு விரைந்து வந்து, காஞ்சிபுரம் வாலாஜாபாத் சாலையில் சாய்ந்து கிடந்த மின் கம்பத்தை சீர் செய்துகொண்டிருந்தனர். அப்போது வயர்மேன் மோகன்ராஜ் மதுபானகடை அருகே உள்ள மின் கம்பத்தின் மீது ஏறி, வாலாஜாபாத் மார்க்கமாக சென்ற லயனை மாற்றி, அவளூர் மார்க்கமாக செல்லும் லைனை இயக்க முயன்றபோது திடீரென எதிர்பாராத விதமாக மின்சாரம் தாக்கி, மின் கம்பத்தின் உச்சியிலேயே பரிதாபமாக உயிரிழந்தார்.
இதைக்கண்டு அதிர்ச்சியுற்ற சக மின் ஊழியர்கள் வாலாஜாபாத் காவல் துறையினருக்கும், தீயணைப்பு மற்றும் மீட்புத்துறையினருக்கும் தகவல் அளித்தனர். அதன்பேரில் சம்பவ இடத்துக்கு விரைந்து வந்த தீயணைப்பு மற்றும் மீட்புத்துறையினர் மின் கம்பத்தில் ஏறி மோகன்ராஜின் உடலில் கயிறு கட்டி கீழே இறக்கினர்.
பின்னர் வாலாஜாபாத் காவல் துறையினர் மோகன்ராஜியின் உடலை கைப்பற்றி பிரேதப்பரிசோதனைக்காக காஞ்சிபுரம் மாவட்ட அரசு தலைமை மருத்துவமனைக்கு அனுப்பி வைத்து விசாரணை செய்து வருகின்றனர். நள்ளிரவு பணியின் போது மின்வாரிய ஊழியர் உயிரிழந்த சம்பவம் அப்பகுதியில் பெரும் சோகத்தை ஏற்படுத்தியுள்ளது.
இதையும் படிங்க:சட்டவிரோதமாக ஏரியில் மணல் அள்ளிய லாரிகளை மடக்கிப்பிடித்த இளைஞர்கள்
