சென்னை: காஞ்சிபுரம் வரதராஜ பெருமாள் கோயில் பிரம்மோற்சவ விழாவில், தென்கலைப் பிரிவினர் மட்டும் பிரபந்தம் பாட அனுமதித்து கோயில் உதவி ஆணையர், கடந்த 14ஆம் தேதி உத்தரவு பிறப்பித்திருந்தார். இந்த உத்தரவை எதிர்த்து வடகலைப் பிரிவை சேர்ந்த நாராயணன் என்பவர் சென்னை உயர் நீதிமன்றத்தில் வழக்குத் தொடர்ந்தார்.
மனுவில் உயர் நீதிமன்ற உத்தரவின்படி வடகலைப் பிரிவினரையும் வேதப் பாராயணம் செய்ய அனுமதிக்க வேண்டும் எனவும், ஒரு பிரிவினருக்கு அனுமதி மறுத்தது சட்டவிரோதமானது எனவும் குறிப்பிட்டு இருந்தார். வழக்கு நீதிபதி எஸ்.எம்.சுப்பிரமணியம் முன் இன்று (மே 18) மீண்டும் விசாரணைக்கு வந்தபோது வடகலைப்பிரிவினர் தரப்பில் ஆஜரான வழக்கறிஞர்கள் இரு தரப்பினரையும் பாராயணம் செய்ய அனுமதிக்க வேண்டும் என வாதிட்டனர்.
ரூ.50 லட்சம் பணம் கொடுக்கவேண்டும் என்றால் இருதரப்பினரும் ஓடிவிடுவர்: மேலும் 11 நொடிகள் மட்டுமே வடகலைப்பிரிவினர் மந்திரங்களை சொல்வதால், ஸ்வாமி ஊர்வலத்துக்கு எந்தப் பாதிப்பும் ஏற்படப்போவதில்லை எனவும் வாதிடப்பட்டது. இதையடுத்து நீதிபதி நாட்டில் பல பிரச்னைகள் நிலவுவதை சுட்டிக்காட்டி, கோயில் சார்பாக 50 லட்சம் ரூபாய் பணம் கொடுக்க வேண்டும் என்றால் இரு தரப்பினரும் ஓடி விடுவர் எனக் கூறினார்.
இரு பிரிவினரும் ஒரே மந்திரத்தை உச்சரிக்க உள்ள நிலையில், வடகலைப் பிரிவினரின் உரிமைகளைப் பாதுகாக்க வேண்டும் என தெரிவித்தார். பிரம்மோற்சவ விழாவில் முதல் மூன்று வரிசைகளில் தென்கலைப் பிரிவினரும், வடகலைப் பிரிவினரும், சாதாரண பக்தர்களும் அமர அனுமதிக்க வேண்டுமென நீதிபதி உத்தரவிட்டு, இதனை கோயில் உதவி ஆணையர் முறைப்படுத்த வேண்டும் என்றும் அறிவுறுத்தினார்.
தென்கலைப் பிரிவினர் முதலில் ஸ்ரீசைல தயாபத்ரம் வாசிக்கவும், பிறகு வடகலைப் பிரிவினர் ஸ்ரீ ராமானுஜ தயாபத்ரம் வாசிக்கவும், அதன் பின்னர் தென்கலை, வடகலை, பிற பக்தர்கள் இணைந்து நாலாயிர திவ்விய பிரபந்தம் பாட அனுமதிக்க வேண்டும் எனவும், தொடர்ந்து தென்கலைப் பிரிவினர் மணவாள மாமுனிகள் வாலி திருநாமமும், வடகலைப் பிரிவினர் தேசிகம் வாலி திருநாமமும் பாட அனுமதிக்க வேண்டுமென நீதிபதி உத்தரவிட்டார்.
இதுதொடர்பாக விரிவான ஏற்பாடுகளை உதவி ஆணையர் மேற்கொள்ளவும், இந்த நடைமுறைகளை வீடியோ பதிவு எடுத்து அவற்றை நீதிமன்றத்தில் தாக்கல் செய்ய உத்தரவிட்டு வழக்கு விசாரணையை மே 25ஆம் தேதி ஒத்திவைத்தார்.
இதையும் படிங்க: ஆயுர்வேத மருத்துவப் படிப்புகளில் இருந்த காலி இடங்களை தனியார் கல்லூரிகள் நிரப்புவதில் தவறில்லை - உயர் நீதிமன்றம்
