சிஐடியு தொழிற்சங்கத்தின் சார்பில் போதைப்பொருள் ஒழிப்பு விழிப்புணர்வு மாரத்தான் போட்டி காஞ்சிபுரத்தில் இன்று நடைபெற்றது. இதனை அம்மாவட்ட ஆட்சியர் பா. பொன்னையா கொடியசைத்து தொடங்கி வைத்தார். இப்போட்டியில், ஏராளமான இளைஞர்களும் பள்ளி கல்லூரி மாணவர்களும் ஆர்வத்துடன் கலந்து கொண்டனர்.
காஞ்சிபுரம் பெரியார் நகர் பகுதியில் இருந்து தொடங்கிய இந்த மாரத்தான் ஓட்டம் தேரடியில் நிறைவு பெற்றது. இதில், வெற்றி பெற்றவர்களுக்கு பரிசும் பாராட்டுச் சான்றிதழும் வழங்கப்பட்டது. இந்நிகழ்ச்சியில், சிஐடியு தொழிற்சங்க மாநிலத்தலைவர் சௌந்தரராஜன், மாநிலங்களவை உறுப்பினர் டி.கே. ரங்கராஜன், திரைப்பட இயக்குனர் லெனின் பாரதி, மற்றும் சிஐடியு தொழிற்சங்க மாவட்ட தலைவர்கள் உட்பட பலர் கலந்து கொண்டனர்.
இந்நிகழ்ச்சிக்கு பின் செய்தியாளர்களை சந்தித்த சிஐடியு சங்க மாநில தலைவர் சௌந்தரராஜன்,
ரிசர்வ் வங்கியில் சேமிப்பு உள்ள ஒரு லட்சத்து 76 ஆயிரம் கோடியை ஒரே நேரத்தில் எடுத்து முதலாளிகளுக்கு கொடுப்பது உலக நாடுகளில் வேறெங்கும் இல்லாத செயல் ஆகும். இவ்வாறு செய்வது விதை நெல்லை எடுத்து விருந்து வைப்பதற்கு சமமாகும்.
மெட்ரோ ரயில் சேவையில் நுட்பமான வேலையை ஒப்பந்த தொழிலாளர்களை வைத்தும், அங்கு பணிபுரியும் துப்புரவு பணியாளர்களை வைத்து செய்வோம் என்று மெட்ரோ நிர்வாகம் தெரிவித்திருப்பது மிகவும் தவறான நடவடிக்கை. ஆகவே மத்திய அரசு இதில் உடனடியாக தலையிட்டு உரிய நடவடிக்கை மேற்கொள்ள வேண்டும் என கூறினார்.
மேலும் பேசிய அவர், நாட்டினுடைய பாதுகாப்புத் துறை, வங்கித் துறை, எல்ஐசி, சேலம் ஸ்டீல், உள்ளிட்ட பொதுத்துறை நிறுவனங்களை தனியாருக்கு தாரை வார்க்கும் ஒரு பாகமாக இந்த மெட்ரோ ரயில் சேவை திட்டமும் செயல்படுவதாக குற்றஞ்சாட்டினார்.
இறுதியில், அரசின் இத்தகைய கொள்கைகளையும் செயல்களை தடுத்து நிறுத்த மக்களும், இளைஞர்களும் போராட முன்வர வேண்டும் என்றும் சௌந்தரராஜன் கேட்டுக்கொண்டார்.
