காஞ்சிபுரம் அருகே வாலாஜாபாத் ஒன்றியத்தைச் சேர்ந்த வில்லிவலம் கிராமத்தைச் சேர்ந்தவர் இளையராஜா. இவர் தனது மகனின் படிப்புச் செலவிற்காக காஞ்சிபுரத்தில் உள்ள ஒரு வழக்கறிஞரிடம் மூன்று லட்ச ரூபாய் பணத்தை கடனாகப் பெற்றுக் கொண்டு அய்யம்பேட்டையில் உள்ள வங்கியில் செலுத்துவதற்காக காரில் வந்துள்ளார்.
அய்யம்பேட்டையில் உள்ள வங்கியில் 2 லட்சத்தை செலுத்தி விட்டு மீதி ஒரு லட்ச ரூபாயை வீட்டிற்கு எடுத்துச் சென்றுள்ளார். அப்போது தனது காரின் பின்பக்க டயர் பஞ்சராகி இருப்பதைக் கண்டு திடுக்கிட்ட இளையராஜா, தனது கையில் வைத்திருந்த பணத்தை காருக்குள் வைத்துள்ளார். இதனையடுத்து காரின் டயரை மாற்ற கார் டிரைவரிடம் கூறிவிட்டு சிறுநீர் கழிப்பதற்காக அருகில் மறைவிடத்திற்குச் சென்றுள்ளார்.
திரும்பி வந்து காரின் கதவைத் திறந்தபோது காரில் இருந்த பணப்பையை மர்ம நபர்கள் கொள்ளையடித்துச் சென்றிருப்பது தெரியவந்தது. இதனையடுத்து, இச்சம்பவம் குறித்து உடனடியாக இளையராஜா வாலாஜாபாத் காவல் நிலையத்தில் புகார் அளித்தார்.
புகாரின் அடிப்படையில் தகவலறிந்து சம்பவ இடத்திற்கு வந்த காவல்துறையினர், இச்சம்பவம் குறித்து வழக்குப் பதிவு செய்து தீவிர விசாரணை மேற்கொண்டு வருகின்றனர்.
