’மக்களின் பொருளாதாரத்தை அரசு மோசமான நிலைக்கு கொண்டுசெல்கிறது’

கள்ளக்குறிச்சி: மத்திய அரசு எடுத்துவரும் எந்த முடிவும் மக்களின் பொருளாதார நிலையை மிகவும் மோசமான நிலைக்கு கொண்டுசெல்வதாக காங்கிரஸ் மூத்தத் தலைவர் பல்லம் ராஜு தெரிவித்துள்ளார்.

காங்கிரஸ் கட்சியின் முன்னாள் மத்திய மனிதவள மேம்பாட்டுத் துறை அமைச்சரும், தமிழ்நாடு காங்கிரஸ் மேலிடப் பார்வையாளருமான பல்லம் ராஜு நேற்று (மார்ச் 26) கள்ளக்குறிச்சிக்கு வருகைதந்தார்.

அப்போது செய்தியாளர்களைச் சந்தித்த அவர் பேசியதாவது:

திமுக, காங்கிரஸ் கூட்டணி மக்கள் நலன் சார்ந்த நல்ல கூட்டணி. இன்று தேசிய அளவில் மோடி அரசின் தவறான கொள்கைகளாலும், திட்டங்களாலும் மக்கள் பெரிதும் பாதிக்கப்பட்டுள்ளனர். மத்திய அரசு எடுத்துவரும் எந்த ஒரு முடிவும் மக்களின் பொருளாதார நிலையை மிகவும் மோசமான நிலைக்கு கொண்டுசெல்கிறது.

பணமதிப்பிழப்பு நடவடிக்கையால் பொதுமக்கள், உழவர்கள், சிறு குறு தொழில் நிறுவனங்கள் கடுமையாகப் பாதிக்கப்பட்டுள்ளன. கரோனா ஊரடங்கு காலத்தில், மத்திய அரசு வேளாண் சட்ட திருத்த மசோதாக்களை எதிர்க்கட்சிகளின் விவாதங்களின்றி திடீரென இரு அவைகளிலும் நிறைவேற்றிவிட்டன. நூறு நாள்களுக்கு மேலாகப் போராடியும் உழவர்களின் நியாயமான கோரிக்கைகளை மத்திய அரசு கண்டுகொள்ளவில்லை.

மறைந்த முதலமைச்சர் ஜெயலலிதா இருந்திருந்தால் பாஜக கூட்டணியை விரும்பியிருக்க மாட்டார். தமிழ்நாட்டில் வேலைவாய்ப்புகள் உருவாக்கப்படவில்லை. சுற்றுச்சூழல் விதிமுறைகளை மீறி கொண்டுவந்த எட்டு வழிச்சாலைத் திட்டத்தால் உழவர்கள் பாதிக்கப்பட்டுள்ளனர். ஊழல் அதிகரித்துள்ளது. இன்று பொறியியல், மருத்துவம் படித்த ஏழு லட்சம் இளைஞர்கள் வேலைவாய்ப்பின்றி உள்ளனர்.

தேர்தல் ஆணையம் உள்ளிட்ட எந்த ஒரு தன்னாட்சி அமைப்புகளும் சுதந்திரமாகச் செயல்படவில்லை. ஜவகர்லால் நேரு தனது ஆட்சிக் காலத்தில் தேசியக் கல்விக் கொள்கையில் இந்தித் திணிப்பை கொண்டுவரவில்லை. ஆனால் இன்று மோடி அரசு மும்மொழிக் கொள்கையை அவசரமாகக் கொண்டுவந்துள்ளது. நீட் தேர்வில் தவறான வருந்தத்தக்க முடிவை மத்திய அரசு எடுத்துள்ளது.

காங்கிரஸ் ஆட்சிக் காலத்தில் சர்வதேச சந்தையில் கச்சா விலை எண்ணெய் கூடுதலாக விற்றபோதும் எரிவாயு, பெட்ரோல் டீசல் விலை குறைவான விலையில் மக்களுக்கு வழங்கப்பட்டது. இன்று கச்சா விலை எரிபொருள் குறைந்துள்ள நிலையில் மத்திய அரசு தேவையானவர்கள் பலன் பெரும் வகையில் அதிக விலைக்கு கொடுக்கப்படுகிறது.

கடந்த சில ஆண்டுகளாக தமிழ்நாட்டில் எந்த ஒரு உயர்க் கல்வி நிறுவனங்களும் உருவாகவில்லை. அனைவருக்கும் உணவளிக்கும் திட்டம், இலவசக் கல்வித் திட்டம் உள்ளிட்ட திட்டங்கள் செயல்படுத்தப்படவில்லை.

இந்திய மக்கள் இந்தத் தேர்தல் மூலம் மோடிக்கு நல்ல பாடம் புகட்டுவார்கள். திமுக தலைவர் மு.க. ஸ்டாலின் தலைமையிலான எங்கள் கூட்டணி மூலம் மக்கள் நலன் சார்ந்த திட்டங்களைக் கொண்டுவருவோம்.

இவ்வாறு அவர் கூறினார்.

இதையும் படிங்க:இஸ்லாமியர்களிடம் வாக்குச் சேகரித்த சேலம் வடக்குத் தொகுதி அதிமுக வேட்பாளர்