கள்ளக்குறிச்சி மாவட்டம் உளுந்தூர்பேட்டை அருகே உள்ள ரகுநாதபுரம் கிராமத்தைச் சேர்ந்தவர் குமரகுரு. இவர் தனக்கு சொந்தமான இடத்தில் சோப்பு கம்பெனி வைத்து நடத்திவந்தார்.
அந்த கம்பெனி சரிவர வைக்கப்பட முடியாத நிலையில் அவர் விழுப்புரத்தைச் சேர்ந்த கில்லி சுகர்ணா என்பவரிடம் வாடகைக்கு விட்டுள்ளார். இந்த நிலையில் கில்லி சுகர்ணா அந்தக் கட்டடத்தில் வியாபாரம் செய்வதாக கூறி வாடகைக்கு எடுத்திருந்த நிலையில் இன்று அதிகாலை அந்தப் பகுதியிலிருந்து ரேஷன் அரிசி லாரிகள் மூலம் ஆந்திர மாநிலத்திற்கு கடத்தப்பட்டுவருவதாக காவல் துறையினருக்கு கிடைத்த தகவலையடுத்து இதுகுறித்து உடனடியாக நடவடிக்கை எடுக்க வேண்டுமென கள்ளக்குறிச்சி மாவட்ட காவல் துறை கண்காணிப்பாளர் ஜெயச்சந்திரன் உத்தரவிட்டார்.
அதன்பேரில் உளுந்தூர்பேட்டை காவல் உதவி ஆய்வாளர் அகிலன் தலைமையில் தனிப்படை காவல் துறையினர் ரகுநாதபுரம் கிராமப் பகுதியில் தீவிர ஆய்வு பணியில் ஈடுபட்டனர். அப்போது அங்குள்ள சோப்பு கம்பெனியிலிருந்து ஒரு லாரி வெளியே வந்தது. லாரியை மடக்கி நிறுத்திய காவல் துறையினர் காரில் இருந்த பொருள்களை ஆய்வு செய்தனர்.
அப்போது லாரியிலிருந்து ரேஷன் அரிசி என்பது தெரியவந்தது. இதையடுத்து லாரியில் இருந்த கில்லி சுகர்ணா உள்ளிட்ட 8 பேரை பிடித்து தீவிர விசாரணை நடத்தினர். அதில் லாரியிலிருந்து ரேஷன் அரிசிதான் என்பதும் இந்த ரேஷன் அரிசி கிராமப்புறப் பகுதியில் உள்ள தனிநபர்கள், ரேஷன் கடைகளில் இருந்து மொத்தமாக வாங்கி வரப்பட்டு அவைகள் தனித்தனியாக தரம் பிரித்து ஆந்திர மாநிலத்திற்கு கடத்தப்பட்டுவருவது தெரியவந்தது.
இதையடுத்து உடனடியாக கடலூர் உணவுப்பொருள் கடத்தல் தடுப்பு பிரிவு காவல் துறையினருக்கு இந்தத் தகவல் தெரிவிக்கப்பட்டது. அதன்பேரில் உணவு பொருள் கடத்தல் தடுப்பு பிரிவு காவல் ஆய்வாளர் ஆரோக்கிய ஜான்சி தலைமையில் காவல் துறையினர் விரைந்து வந்து சோப்பு கம்பெனியில் ஆய்வு செய்தனர்.
அங்கிருந்த 15 டன் எடை கொண்ட 240 அரிசி மூட்டைகள், லாரி உள்பட மூன்று வாகனங்களையும் பறிமுதல் செய்தனர். மேலும் ரேஷன் அரிசியை ஆந்திர மாநிலத்திற்கு கடத்திவரும் கில்லி சுகர்ணா, அவரது கூட்டாளிகள் 8 பேர் உள்பட 9 பேரை காவல் துறையினர் கைது செய்து விசாரணை நடத்திவருகின்றனர்.
