ஈரோடு: கிருஷ்ணகிரி மாவட்டம் சூளகிரி பகுதியைச் சேர்ந்தவர்கள் வருண் (23), அஜித் (23). இவர்கள் இருவரும், அதே பகுதியைச் சேர்ந்த நண்பர்கள் சிவராஜ், திம்மராஜ், முரளி, ஹரிஷ் ஆகிய 6 பேருடன் மூன்று இருசக்கர வாகனங்களில் மேட்டுப்பாளையம் பிளாக் தண்டர் செல்வதற்காக இன்று (ஏப்.30) புறப்பட்டனர்.
அப்போது சத்தியமங்கலம் - மேட்டுப்பாளையம் சாலை அக்கரை தத்தப்பள்ளி பிரிவு அருகே சத்தியமங்கலம் நோக்கி வந்துகொண்டிருந்த மினி லாரி மீது வருண், அஜித் சென்ற இருசக்கர வாகனம் மோதி விபத்துக்குள்ளானது.
இந்த விபத்தில் இருசக்கர வாகனத்தில் சென்ற வருண், அஜித் ஆகியோர் தூக்கி வீசப்பட்டு கீழே விழுந்தனர். இருவருக்கும் தலையில் பலத்த காயம் ஏற்பட்டு சம்பவ இடத்திலேயே உயிரிழந்தனர்.
இது குறித்து தகவலறிந்த பவானிசாகர் காவல் துறையினர் சம்பவ இடத்திற்கு விரைந்து சென்று விபத்தில் சிக்கி உயிரிழந்த இருவரின் உடல்களை மீட்டு உடற்கூராய்வுக்காக சத்தியமங்கலம் அரசு மருத்துவமனைக்கு அனுப்பி வைத்தனர். தொடர்ந்து இச்சம்பவம் குறித்து வழக்குப்பதிவு செய்த காவல் துறையினர், விசாரணை நடத்தி வருகின்றனர்.
இதையும் படிங்க: ஆந்திராவை உலுக்கிய பிடெக் மாணவி கொலை வழக்கில் இளைஞருக்கு மரண தண்டனை!
