கடந்த சில வருடங்களாக இயற்கை பேரிடர் தமிழ்நாட்டை அதிகமாகவே தாக்கிவருகிறது. குறிப்பாக, தலைநகரான சென்னையை பருவமழை காலங்களில் தொடர்ச்சியாகவே இயற்கை பேரிடர் தாக்கி வருகின்றது.
அதுபோன்ற பேரிடர் காலங்களில் மழை வெள்ளத்தில் சிக்கியவர்களை மீட்புக் குழுவினர் பாதுகாப்பாக மீட்பதில் பெரும் போராட்டத்தை சந்திக்கும் நிலையில், அவர்களின் மீட்பு பணியை எளிதாக்கும் வகையில் ஒரு புதிய இயந்திரத்தை கண்டுபிடித்துள்ளனர் பண்ணாரி அம்மன் பொறியியல் கல்லூரி மாணவர்கள்.
இந்த இயந்திரம் முழுவதும் பிவிசி பைப்புகளைக் கொண்டு, நீர் புகாதவண்ணம் வடிவமைக்கப்பட்டுள்ளது. ஐந்து கிலோ எடைகொண்ட இந்த இயந்திரத்தில் ஜிபிஎஸ்ஸூம் பொருத்தப்பட்டுள்ளது. இயந்திரம் சுமார் 80 கிலோ எடையுள்ளவர்களை இழுக்கும் திறன் கொண்டது. அதுமட்டுமின்றி இரண்டு கிலோ மீட்டர் தூரம் வரை பயணித்து 5 மணி நேரம் செயல்பட்டு நீரில் மூழ்கிய வரை காப்பாற்றும் திறன் கொண்டது.
தேசிய அளவிலான விஸ்வகர்மா விருதினை முதல் சுற்றிலேயே இந்த இயந்திரம் பெற்றுத்தந்துள்ளது. அடுத்த சுற்றுக்கு தகுதி பெற்றுள்ள இந்த இயந்திரத்தை கண்டுபிடித்த மாணவர்கள் எதிர்வரும் ஜனவரி மாதம் இந்திய தொழில்நுட்பக் குழு நடத்தும் போட்டியில் பங்கேற்கும் வாய்ப்பினை பெற்றுள்ளனர்.
இந்த இயந்திரத்தை பண்ணாரி அம்மன் கல்லூரியைச் சேர்ந்த இயந்திரவியல் மாணவர் கே. யுவன்சங்கர், மின்னணுவியல் மாணவிகள் சந்தியா, ஆர் ரம்யா மற்றும் கணினி அறிவியல் மாணவிகள் இந்திரா, பிரியதர்ஷினி, மைதிலி ஆகியோர் ஆய்வகப் பொறியியல் பயிற்சியாளர்கள் கே. நந்தகுமார், டி. செல்லம், முத்துக்குமரன் ஆகியோருடன் இணைந்து உருவாக்கி உள்ளனர்.
இதையும் படிங்க...' உள்ளாட்சித் தேர்தலை நடத்தக் கூடாது என்பதில் அரசு கவனம் செலுத்துகிறது ' - கே.எஸ். அழகிரி
