ஈரோடு மாவட்டம் எழுமாத்தூர் பகுதியில் காவல் துறையினருக்கான மாநில அளவிலான துப்பாக்கி சுடும் பயிற்சி மையம் கடந்த பல ஆண்டுகளாக செயல்பட்டு வருகிறது. இந்தப் பகுதியில் போதிய பாதுகாப்பு இல்லாமல் இருப்பதாகவும், பயிற்சி பெறுவதற்கான அடிப்படை வசதிகள் குறைவாக இருப்பதாக மாவட்ட, மாநில காவல் துறைக்கு முறையீடு செய்யப்பட்டது.
மேலும், மாநில அளவில் காவல் துறையில் தேர்வு செய்யப்படும் காவலர்கள், உதவி ஆய்வாளர்கள் உள்ளிட்டோருக்கு பயிற்சி வழங்கிடும் வகையில், இந்த துப்பாக்கி சுடும் மையத்தை மேம்படுத்திட வேண்டும் என்கிற கோரிக்கையும் தொடர்ந்து விடுக்கப்பட்டு வந்தது.
இதனைத்தொடர்ந்து மாநில துப்பாக்கி பயிற்சி மையத்தை மேம்படுத்துவதற்கு தமிழ்நாடு அரசின் சார்பில், சட்டப்பேரவை உறுப்பினர் தொகுதி மேம்பாட்டு நிதியிலிருந்து தொகை ஒதுக்கப்பட்டது.
இதையடுத்து துப்பாக்கி சுடும் பயிற்சி மையத்தை பாதுகாப்பான பகுதியாக மாற்றியமைத்திட மதில் சுவர்கள் அமைத்திடவும், பயிற்சி மேற்கொள்வதற்கு ஏதுவாக தரைத்தளம் அமைத்திடவும் முடிவு செய்யப்பட்டு அதற்கான தொடக்கவிழா இன்று நடைபெற்றது. இதில் மாவட்ட காவல் கண்காணிப்பாளர் தங்கதுரை, மொடக்குறிச்சி சட்டப்பேரவை உறுப்பினர் சிவசுப்பிரமணி ஆகியோர் கலந்து கொண்டு திட்டத்தைத் தொடங்கிவைத்தனர்.
