ஈரோடு மாவட்ட எல்லையில், தெங்குமரஹாடா ஆரம்ப சுகாதார நிலையத்தில் மருத்துவராகப் பணியாற்றிய ஜெயமோகன், உடல்நலக்குறைவால் கோவை மருத்துவமனையில் சேர்க்கப்பட்டு சிகிச்சைப் பலனின்றி உயிரிழந்தார். இதனால் கிராமத்தில் தங்கி சேவை செய்த மருத்துவரை இழந்த, அக்கிராமம் சோகத்தில் மூழ்கியது. சத்தியமங்கலம் புலிகள் காப்பகம், நீலகிரி மாவட்டத்தின் வனப்பகுதியில் அடர்ந்த மலைகளுக்கு மத்தியில் தெங்குமரஹாடா கிராமம் அமைந்துள்ளது.
இக்கிராமத்தைச் சுற்றிலும் மாயாறு ஓடுகிறது. இதனால் மக்கள் பரிசல் மூலம் மாயாற்றைத் தாண்டி கிராமத்துக்குள் செல்கின்றனர். சுமார் 5 ஆயிரம் பேர் வசிக்கும் இக்கிராமத்தில் மருத்துவ சேவைக்கு ஆரம்ப சுகாதார நிலையம் செயல்பட்டு வருகிறது. அடர்ந்த காட்டுப்பகுதி என்பதால் இங்கு தங்கிப் பணியாற்ற வேண்டும் என்பதால் டாக்டர்கள் எவரும் முன் வரவில்லை. இந்நிலையில் சிறுமுகையைச் சேர்ந்த இளம் மருத்துவர் மரு.ஜெயமோகன் (26) என்பவர், விருப்பம் தெரிவித்து 3 ஆண்டுகளாக பணியாற்றி வந்தார்.
மக்களிடையே அன்பாகப் பழகி தெங்குமரஹாடா கிராமத்தில் தங்கிப் பணியாற்றினார். இரவு நேரத்தில் கூட மருத்துவமனை சேவையாற்றிய ஜெயமோகன் கடந்த சில நாள்களுக்கு முன்பு டெங்குவால் பாதிக்கப்பட்டார். பவானிசாகரில் இருந்து வந்த 108 ஆம்புலன்ஸ் ஊழியர்கள் ஆற்றைக் கடந்து மருத்துவர் ஜெயமோகனை மீட்டு கோவை அரசு மருத்துவமனைக்கு அழைத்துச் சென்றனர். அங்கு சிகிச்சைப் பெற்று வந்த மருத்துவர் ஜெயமோகன் உடல்நிலையில் முன்னேற்றம் ஏற்படாமல், சிகிச்சைப் பலனின்றி உயிரிழந்தார். சேவை மனப்பான்மையுடன் கூடிய இளம் மருத்துவர் உயிரிழந்த சம்பவம், அக்கிராமத்தில் சோகத்தை ஏற்படுத்தியுள்ளது. 24 மணி நேரமும் நேரம் பார்க்காமல் மருத்துவ சேவையாற்றிய இளம் வயது மருத்துவரை இழந்து தெங்குமரஹாடா கிராமம் சோகத்தில் மூழ்கியுள்ளது.
இதையும் படிக்க:மூடப்பட்ட டாஸ்மாக்: மெத்தனாலை குடித்த மூன்று பேர் உயிரிழப்பு
