'இருமொழிக்கொள்கைதான் நிறைவேற்றப்படும்' அமைச்சர் செங்கோட்டையன்

ஈரோடு: தமிழ்நாட்டில் இருமொழிக் கல்விக் கொள்கைத்தான் நிறைவேற்றப்படும் என பள்ளிக் கல்வித் துறை அமைச்சர் செங்கோட்டையன் தெரிவித்துள்ளார்.

கோபிசெட்டிபாளையத்தில் பள்ளிக் கல்வித் துறை அமைச்சர் கே.ஏ. செங்கோட்டையன் தன் இல்லத்தில் வைத்து செய்தியாளர்களுக்குப் பேட்டியளித்தார்.

அப்போது, "கரிக்குலம் பாடத்திட்டத்தில் இந்தியாவே வியக்கும் வகையில் 2, 3, 4, 5, 7, 8, 10, 12 ஆகிய வகுப்புகளுக்கு பாடத்திட்டங்கள் மாற்றியமைக்கப்பட்டுள்ளதே ஜூன் மூன்றாம் தேதி பள்ளிகள் திறக்கப்படுவதற்கு காரணமாகும்.

மூன்று ஆண்டு காலத்தில் மாற்றியமைக்கப்படும் என்று அறிவித்திருந்தோம். ஆனால், தற்போது இரண்டே ஆண்டுகளில் அனைத்து வகுப்புகளுக்கும் பாடத்திட்டங்கள் 12 ஆண்டு காலத்திற்குப் பிறகு மாற்றியமைக்கப்பட்டுள்ளது.

210 நாட்கள் தொடர்ந்து விடுமுறை இல்லாமல் இருந்தால் மட்டுமே, புதிய பாடத்திட்டப் பாடங்களை முழுமையாக முடிக்க முடியும். புதிய பாடத்திட்டத்தில் உருவான பாடப்புத்தகங்கள் பள்ளி திறக்கும் நாளான மூன்றாம் தேதி முதலமைச்சர் திருக்கரங்களால் வெளியிடப்படும்" எனத் தெரிவித்தார்.

தொடர்ந்து மத்திய அரசு கொண்டுவந்துள்ள புதிய கல்விக் கொள்கை குறித்து கேளிவிக்கு பதிலளித்த அமைச்சர் செங்கோட்டையன், "அண்ணா, எம்ஜிஆர், ஜெயலலிதா ஆகியோருக்கு இரு மொழிக்கொள்கை என்பது முடிவாக இருந்தது. சட்டப்பேரவையில் கூட இரு மொழிக்கொள்கைதான் கடைப்பிடிக்கப்படும் எனத் தீர்மானம் நிறைவேற்றப்பட்டுள்ளது. அதனால் தமிழ்நாட்டில் இரு மொழிக்கொள்கை தான் நடைமுறைப்படுத்தப்படும்" எனக் கூறியுள்ளார்.