நீட் தேர்விற்கு எதிராக பரப்புரை மேற்கொண்டு வரும் திராவிடர் கழக தலைவர் கி.வீரமணி, ஈரோடு சூரம்பட்டி நான்கு சாலையில் நடைபெற்ற பொதுக்கூட்டத்தில் கலந்துகொண்டு பேசினார்.
அப்போது பேசிய அவர், 'நீட் தேர்வின் பாதிப்பு தெரிய வேண்டுமானால் பெரியாரின் கண்ணாடி அணிய வேண்டும். நீட் தேர்வு அரசியல் சட்டத்திற்கும் சமூக நீதிக்கும் எதிரானது. மாநில உரிமைகளைப் பறிக்கும் செயல். தமிழ்நாட்டில் 21 ஆண்டுகளாக இருந்த நுழைவுத் தேர்வு ரத்து செய்யப்பட்டது திமுக ஆட்சியில் தான். பெரியார் ஒரு மின்சாரம் அது தெரியாமல் சிலர் கை வைக்கின்றனர். மின்சாரம் வெளிச்சமும் தரும் ஷாக்கும் அடிக்கும்' என்றார்.
அதனைத் தொடர்ந்து செய்தியாளர்களிடம் பேசிய அவர், 'இம்மண்ணில்தான் குலக் கல்வியை எதிர்த்து தந்தை பெரியார் சூளுரைத்தார். அதேபோல் தற்போது நீட் மற்றும் 5, 8ஆம் வகுப்பு பயிலும் மாணவர்களுக்கு பொதுத் தேர்வை ரத்து செய்வதற்கான போராட்டத்தில் சர்வபலி தியாகம் செய்வதற்கு தயாராக உள்ளோம்' என்று தெரிவித்தார்.
மேலும், நடிகர் ரஜினிகாந்த் பெரியார் குறித்து பேசியது தொடர்பான கேள்விக்கு, நீதிமன்றத்தில் தீர்வு காண்போம் என்றார்.
இதையும் படிங்க: ரஜினியிடம் மோதுனா தோத்துடுவீங்க - ஸ்டாலினுக்கு கராத்தே அட்வைஸ்
