ஈரோடு மாவட்டம் கோபிச்செட்டிபாளையம், குருமந்தூர், கோசனம், கெட்டிச்செவியூர் உள்ளிட்ட பத்துக்கும் மேற்பட்ட ஊராட்சிகளில் அதிமுக கட்சியின் சார்பில் உள்ளாட்சித் தேர்தலில் போட்டிடும் வேட்பாளைர்களை ஆதரித்து பள்ளிக்கல்வித்துறை அமைச்சர் கே.ஏ.செங்கோட்டையன் திறந்த வாகனத்தில் நின்று பரப்புரையில் ஈடுபட்டார்.
பரப்புரையின்போது அந்தந்த ஊராட்சிகளில் போட்டிடும் தலைவர், வார்டு உறுப்பினர்கள், ஒன்றியக்குழு உறுப்பினர்கள் மாவட்ட உறுப்பினர்கள் என அனைவருக்கும் அவரவர்களின் சின்னங்களில் மக்கள் வாக்களிக்க வேண்டும் என்றும் தமிழ் நாடு அரசு ஊராட்சிகளுக்கு பல்வேறு வளர்ச்சித் திட்டங்களை செய்துள்ளதாகவும் அது போல் ஊராட்சிகளில் மென்மேலும் வளர்ச்சித்திட்டங்கள் நடைபெற வேண்டுமெனில் அதிமுக சார்பில் போட்டிடும் வேட்பாளர்களுக்கு வாக்களியுங்கள் என்றார்.
தொடர்ந்து பேசியவர், மத்திய அரசிடமிருந்து உள்ளாட்சிகளுக்கு ரூ.6 ஆயிரம் கோடி வரவேண்டியுள்ளது. தேர்தல் முடிந்ததும் அந்தத் தொகை உள்ளாட்சிகளுக்கு வந்து சேரும். அப்போது கிராமங்களுக்கு அனைத்துத் திட்டங்களும் விரைந்து நிறைவேற்றப்படும் என்றும் மேலும், பள்ளிக்கல்வித்துறை சார்பில் நிறைவேற்றப்பட்டுள்ள திட்டங்கள் குறித்தும் வாக்காளர்களிடம் எடுத்துரைத்து வாக்கு சேகரித்தார்.
அதைத் தொடர்ந்து செய்தியாளர்களைச் சந்தித்த அவர், "அரையாண்டுத் தேர்வில் 10, 12 ஆகிய வகுப்புகளின் வினாத்தாள்கள் வெளியாகியுள்ளதற்கு தேர்வுத்துறை சார்பில் வினாத்தாள்கள் குறுந்தகடு வடிவில் ஒவ்வொரு மாவட்டத்திற்கும் அனுப்பப்படுகிறது. அது எங்கு வெளியாகிறது என்று தெரியவில்லை. ஆதலால் வெளியான வினாத்தாள்கள் மாற்றியமைக்கப்பட்டுள்ளன" எனத் தெரிவித்தார்.
இப்பரப்புரையில் நம்பியூர் ஒன்றியச் செயலாளர், அதிமுக கழக நிர்வாகிகள் உட்பட பலர் கலந்து கொண்டனர்.
இதையும் படியுங்க:
கரூரில் கோயில் நிலங்கள் ஆக்கிரமிப்பு பிரச்னைக்கு விரைவில் தீர்வு: பரப்புரையின்போது அமைச்சர் உறுதி!
