திண்டுக்கலில் உள்ள அனுமந்தராயன் கோட்டை கிராமத்தில் சுமார் 250 குடும்பங்கள் வசித்து வருகின்றன. இங்கு சில ஆண்டுகளாக குடிநீர் பிரச்னை இருந்து வருகிறது. இதற்கு அரசும், ஊராட்சி நிர்வாகமும் நிரந்தர தீர்வை எடுக்காமல் காலம் கடத்தி வந்துள்ளன. தற்போது கோடைகாலம் என்பதால் குடிநீர் தட்டுப்பாடு அதிகமாக உள்ளது. அதனால், தனியார் நிறுவனங்கள் விற்கும் கேன் வாட்டரை பணம் கொடுத்து வாங்கும் நிலைக்குத் தள்ளப்பட்டுள்ளனர்.
இந்நிலையில், திண்டுக்கல் மாவட்ட ஆட்சியர் அலுவலகத்திற்கு அனுமந்தராயன் கோட்டை கிராம மக்கள், காலிக்குடங்களுடன் இன்று வந்தனர். குடிநீர் அளிக்காத அரசையும், கிராம நிர்வாக அலுவலர்களையும் எதிர்த்து கோஷங்கள் எழுப்பி போராட்டத்தில் ஈடுபட்டனர்.பின்னர் இவர்களிடம் காவல்துறையினர் சமரசம் பேசி கலைந்து போகச் செய்தனர். இதனை அடுத்து மாவட்ட ஆட்சியரிடம் புகார் மனுவை அளித்தனர்.
இது குறித்து அனுமந்தராயன் கோட்டை கிராம மக்கள் கூறுகையில்,"வறட்சியைக் காரணம் காட்டி அனுமந்தராயன் கோட்டை கிராமத்தில் குடிநீர் பிரச்னைக்கு தீர்வு காணப்படுவதில்லை. ஆனால், தனியார் நிறுவனங்களுக்கு தண்ணீரை விற்கின்றனர். குடிப்பதற்கான நீரை பணம் கொடுத்து வாங்கி சமாளிக்கிறோம். ஆனால், பெண்களும், சிறுமிகளும் கழிப்பறையைப் பயன்படுத்தக்கூட தண்ணீருக்கு அல்லல்படும் அவலநிலைக்குத் தள்ளப்பட்டுள்ளனர். காவிரி கூட்டுக் குடிநீர் திட்டத்திற்கு வாய்ப்பிருந்தும், ஊராட்சி நிர்வாகம் அலட்சியம் காட்டுகிறது. அடுத்த வாரத்தில் குடிநீருக்கு நிரந்தர தீர்வு எடுக்கவில்லை எனில் ஆதார் கார்டு, ரேஷன் கார்டு உள்ளிட்டவற்றை அரசிடம் திருப்பியளிப்போம்" என்றார்.
இச்சம்பவத்தால் மாவட்ட ஆட்சியர் அலுவலக வளாகத்தில் சிறிது நேரம் பரபரப்பு ஏற்பட்டது.
