திண்டுக்கல் மாவட்டம் வேடசந்தூர் சட்டப்பேரவைத் தொகுதிக்குள்பட்ட வேடசந்தூர் பேரூராட்சி 170ஆவது வாக்குச்சாவடியான அரசு மகளிர் பெண்கள் மேல்நிலைப் பள்ளியில் திமுகவினர் தேர்தல் நடத்தும் அலுவலர்கள்போல் அமர்ந்து பூத் ஸ்லிப் வழங்கி வாக்குச் சேகரிப்பில் ஈடுபட்டுவந்ததாகக் கூறப்படுகிறது.
இதைத் தெரிந்துகொண்ட அதிமுகவினர் தேர்தல் அலுவலர்கள், காவல் துறையினரிடம் தேர்தல் விதிமுறைகளை மீறி அமர்ந்துள்ளதாகப் புகார் தெரிவித்தும் நடவடிக்கை இல்லாமல் இருந்ததால் வாக்குச்சாவடிக்கு உள்ளே சென்ற அதிமுகவினர் வாக்குவாதத்தில் ஈடுபட்டனர்.
இதைத் தொடர்ந்து சிறிது நேரத்தில் திமுகவினர் சுமார் 30-க்கும் மேற்பட்டோர் திடீரென வாக்குச்சாவடி மையத்திற்கு முன்பு குவிந்து அதிமுகவினர் உடன் சாலையில் நின்று வாக்குவாதத்தில் ஈடுபட்டனர்.
இந்த நிலையில் திடீரென இரு தரப்பினரும் மோதலில் ஈடுபட்டுக்கொண்டனர். இதனால் வேடசந்தூர் வடமதுரை சாலையில் போக்குவரத்து பாதிப்பு ஏற்பட்டது. வாக்குச்சாவடி முழுவதும் பரபரப்பான சூழ்நிலை நிலவியது.
தகவல் அறிந்த வேடசந்தூர் காவல் துறையினர் சம்பவ இடத்திற்கு விரைந்து மோதலில் ஈடுபட்டவர்களைக் கலைந்துசெல்ல அறிவுறுத்தினர். வாக்குச்சாவடிக்கு முன்பு திமுகவினர், அதிமுகவினர் இடையே மோதல் ஏற்பட்டது அப்பகுதியில் பெரும் பரபரப்பை ஏற்படுத்தியது.
இதையும் படிங்க: ’அனைவரும் வாக்களித்து ஜனநாயகக் கடமையை நிறைவேற்ற வேண்டும்’ - முதலமைச்சர் வேண்டுகோள்
