திண்டுக்கல்லில் இருந்து வேடசந்தூரை நோக்கி அரசுப் பேருந்து சென்று கொண்டிருந்தது. அஞ்சலி ரவுண்டானா பகுதியில் பேருந்து சென்றபோது அதில் பயணம் செய்த ஒரு இளைஞர் திடீரென கத்தியைக் காட்டி மிரட்டி, பயணி ஒருவரிடம் 500 ரூபாயை பறித்துக் கொண்டு, பேருந்திலிருந்து குதித்து ஓடினார்.
இந்நிலையில், பேருந்தில் பயணித்த ஒட்டன்சத்திரம் போக்குவரத்துக் காவலரான கார்த்தி, பேருந்திலிருந்து குதித்து திருடனை விரட்டிச் சென்று பிடித்தார். இதனையடுத்து அங்கு குவிந்த பொதுமக்கள் பணம் பறித்த திருடனை பிடித்து, வைத்து சரமாரியாக அடித்து உதைத்தனர். பிடிபட்ட திருடனை விசாரித்ததில் பெயர் மற்றும் ஊரை மாற்றி, மாற்றி கூறியுள்ளான்.
தகவலறிந்து சம்பவ இடத்திற்கு வந்த தாடிக்கொம்பு காவல் நிலைய காவல் துறையினர், திருடனை காவல் நிலையம் அழைத்து சென்று விசாரணை நடத்தி வருகின்றனர். ஓடும் பேருந்திலிருந்து குதித்து திருடனைப் பிடித்த காவலர் கார்த்திக்கை பொதுமக்கள் வெகுவாகப் பாராட்டினர்.
இதையும் படிங்க: மதுரை சுங்க கட்டண மையம் விவகாரம்: அரசு தரப்பிற்கு கால அவகாசம் வழங்கிய உயர் நீதிமன்றம்!
