திண்டுக்கல்: பழனி நகராட்சியில் 33 வார்டுகள் உள்ளன. இங்கு உள்ள 7-வது வார்டு பகுதிக்கு உட்பட்ட கீழ் வடம் போக்கி தெருவில் நகராட்சி சார்பில் தார்சாலை அமைக்கும் பணி நடைபெற்றது. இந்நிலையில் சாலை அமைக்கும் பகுதியில் உள்ள அடிகுழாய் ஒன்றையும் சேர்த்து தார்சாலை அமைத்து மூடியதால் தண்ணீர் பிடிக்க முடியாமல் அப்பகுதி மக்கள் அதிர்ச்சி அடைந்துள்ளனர்.
இது தொடர்பாக கருத்து கூறி அப்பகுதி மக்கள் "நல்ல நிலையில் செயல்பட்டு வரும் அடிகுழாயை மூடி தார்சாலை அமைத்துள்ளதால், தண்ணீர் பிடிப்பதில் பெரும் சிரமம் ஏற்பட்டுள்ளது. 7வது வார்டு கவுன்சிலராக திமுகவை சேர்ந்த சுரேஷ் என்பவர் உள்ளார். தார்சாலை அமைக்கும் போது பழைய சாலையை அகற்றி எடுத்துவிட்டு புதியசாலை அமைக்காமல், அதன் மீதே சாலை அமைத்துள்ளதாகவும், தார்சாலை அமைக்கும் போது, நல்ல நிலையில் செயல்பட்டுவரும் அடிகுழாயை மூடி தார்சாலை அமைக்கலாமா? என்ற அடிப்படை யோசனைகூட இல்லாமல் வார்டு கவுன்சிலர் ஆரம்பித்து சாலை அமைத்த ஒப்பந்ததாரர் மற்றும் நகராட்சி அதிகாரிகள் வரை யாருமே இதை கண்டுகொள்ளாமல் இருந்தது எப்படி?" என கேள்வி எழுப்பியுள்ளனர்.
தமிழ்நாட்டில் ஏற்கனவே வேலூர், தஞ்சாவூர் உள்ளிட்ட பகுதிகளில் அடிகுழாய், மின்கம்பங்கள் ஆகியவற்றுடன் சேர்த்து தார்ச்சாலை அமைக்கப்பட்ட சம்பவம் பெரும் சர்ச்சையை ஏற்படுத்திய நிலையில், அதன் பிறகு சம்பந்தப்பட்ட அதிகாரிகள், ஒப்பந்தாரர்கள் மீது நடவடிக்கை எடுக்கப்பட்டது. தற்போது பழனியிலும் இது போன்ற ஒரு சம்பவம் அரங்கேறியது பொதுமக்களிடையே அதிருப்தியை ஏற்படுத்தியுள்ளது.
கோடைகாலம் ஆரம்பித்துள்ள நிலையில், தண்ணீர் பிரச்னையை தீர்க்கும் விதமாக நல்லமுறையில் செயல்படும் இந்த அடிகுழாய் அதிகாரிகளின் அலட்சியத்தால் வீணாகியுள்ளதாக வேதனை தெரிவிக்கும் அப்பகுதி மக்கள், நகர்மன்ற கவுன்சிலர் சுரேஷிடம் பலமுறை தெரிவித்தும் அதை சரிசெய்ய அவர் நடவடிக்கை எடுக்கவில்லை என்றும் குற்றம் சாட்டியுள்ளனர்.
இதையும் படிங்க: ஈரோடு கிழக்கு தொகுதியில் குளறுபடி- உயர் நீதிமன்றத்தில் மனுத் தாக்கல்!
