திண்டுக்கல்: காட்டு யானைகள் நடமாட்டம் இருப்பதாகக் கூறி, மூன்று மாதங்கள் ஆகியும் வனத்துறை கட்டுப்பாட்டில் உள்ள பேரிஜம் ஏரிக்கு செல்வதற்கான தடை தொடர்வதால், சுற்றுலாப் பயணிகள் பெரும் ஏமாற்றத்தில் உள்ளனர். திண்டுக்கல் மாவட்டத்தில் உள்ள கொடைக்கானல், முக்கிய சுற்றுலாத் தலமாக இருந்து வருகிறது. இங்கு தமிழகம் மட்டுமின்றி, பல்வேறு மாநிலங்களைச் சேர்ந்த சுற்றுலாப் பயணிகளும் வருகை தருகின்றனர்.
இந்நிலையில், தற்போது தொடர் விடுமுறையை அடுத்து, சுற்றுலாப் பயணிகளின் வருகை கணிசமாக அதிகரித்துக் காணப்படுகிறது. கொடைக்கானலுக்கு வரும் சுற்றுலாப் பயணிகள், பிரதான சுற்றுலாப் பகுதிகளாக இருக்கக்கூடிய மோயர் சதுக்கம், குணா குகை, தூண்பாறை, பசுமை பள்ளத்தாக்கு உள்ளிட்ட இடங்களைக் கண்டு ரசிப்பது வழக்கம். அதேபோல், இங்குள்ள முக்கிய சுற்றுலாப் பகுதிகளில் ஒன்றான பேரிஜம் ஏரிக்குச் சென்றும், தங்களின் இனிமையான நேரங்களைச் செலவிடுவர்.
இந்த பேரிஜம் ஏரி, பாதுகாக்கப்பட்ட வனப்பகுதியில் உள்ளது. ஆகையால், அங்கு செல்வதற்கு வனத்துறையிடம் சிறப்பு அனுமதி வாங்கிச் செல்ல வேண்டும். மேலும், பேரிஜம் ஏரிக்குச் செல்லும் வழியில் மதிகெட்டான் சோலை, தொப்பி தூக்கி பாறை உள்ளிட்ட பல பகுதிகளைக் காணலாம். இந்நிலையில், இந்த பேரிஜம் ஏரி பகுதியில் யானைகள் நடமாட்டம் இருக்கும் போதெல்லாம், சுற்றுலாப் பயணிகளின் பாதுகாப்பு கருதி தடை விதிக்கப்படும்.
அவ்வாறு, கடந்த மூன்று மாதங்களுக்கு முன்பாக பேரிஜம் ஏரி பகுதியில், காட்டு யானைகள் முகாமிட்டு இருப்பதாகக் கூறி, சுற்றுலாப் பயணிகள் செல்வதற்கு வனத்துறையினர் தடை விதித்து இருந்தனர். ஆனால், மூன்று மாதங்கள் ஆகியும் தற்போது வரை அந்தப் பகுதி திறக்கப்படாமல் இருந்து வருகிறது. இதனால் கொடைக்கானலுக்கு வரும் சுற்றுலாப் பயணிகள் பெரும் ஏமாற்றம் அடைந்துள்ளனர்.
இதையும் படிங்க: சென்னையில் 11 கிலோ கடத்தல் தங்கம் பறிமுதல்.. துபாய் குருவிகள் சிக்கியது எப்படி?
எனவே, சுற்றுலாவை மேம்படுத்துவதற்காகவும், சுற்றுலாப் பயணிகளை ஊக்குவிப்பதற்காகவும் பேரிஜம் செல்வதற்கு வனத்துறையினர் மீண்டும் அனுமதி வழங்க வேண்டும் என்ற கோரிக்கை தொடர்ந்து எழுந்து வருகிறது. இந்நிலையில், கொடைக்கானல் நகர் பகுதியில் அமைந்துள்ள பியர் சோலா அருவியையும் வனத்துறையினர் முடக்கி உள்ளது குறிப்பிடத்தக்கது.
இதையும் படிங்க: இலங்கைக்கு கடத்த முயன்ற ரூ.75 கோடி மதிப்பிலான போதைப் பொருள் பறிமுதல்!
