திண்டுக்கல் மாவட்டம் வத்தலக்குண்டில் ஏடிஎம் இயந்திரத்தில் பணம் எடுக்கச் சென்றவர் பணம் வராத ஆத்திரத்தில் ஏடிஎம் இயந்திரத்தை காலால் மிதித்து, கல்லால் உடைத்த காட்சிகள் வீடியோவாக வெளியாகி பரபரப்பை ஏற்படுத்தியுள்ளது.
திண்டுக்கல் மாவட்டம் வத்தலக்குண்டில் அரசுடைமை ஆக்கப்பட்ட வங்கி ஒன்று செயல்பட்டு வருகிறது. இந்த வங்கியின் மற்றொரு பகுதியில் பரிவர்த்தனைக்காக பணம் எடுக்கும் ஏடிஎம் இயந்திரம் வைக்கப்பட்டுள்ளது. இந்நிலையில் இந்த ஏடிஎம் இயந்திர அறைக்குள் வந்த வாடிக்கையாளர் ஒருவர் பணம் எடுப்பதற்கு முற்பட்டுள்ளார்.
ஆனால், இயந்திரத்தில் பணம் இல்லாததால் அவருடைய தொகை வரவில்லை. பலமுறை முயற்சித்தபோதும் பணம் வராததால் ஆத்திரமடைந்த அவர் ஏடிஎம் இயந்திரத்தை காலால் எட்டி உதைத்துள்ளார்.
பின்பு, ஏடிஎம் இயந்திரத்தை விட்டு வெளியே சென்ற அவருக்கு ஆத்திரம் அடங்காததால் வெளியிலிருந்த பெரிய கல்லை எடுத்துவந்து ஏ.டி.எம் இயந்திரத்தின் மீது வீசி அதனை உடைத்துவிட்டு தப்பி ஓடினார். இதனால், அவருக்குப் பின்னால் பணம் எடுக்க வந்த வாடிக்கையாளர்கள் அதிர்ச்சியடைந்தனர்.
இச்சம்பவம் அனைத்தும் அங்குள்ள கண்காணிப்புக் கேமராவில் பதிவாகியிருந்தது. இது குறித்து வங்கி மேலாளர் சரண், காவல் நிலையத்தில் அளித்த புகாரின் பேரில் காவல் துறையினர் விசாரணையை தொடங்கினர். அதில், ஏடிஎம் இயந்திரத்தை காலால் மிதித்து, கல்லைத் தூக்கி வீசி உடைத்தது சேவுகம்பட்டி கிராமத்தைச் சேர்ந்த லாரி ஓட்டுநர் கிருஷ்ணமூர்த்தி என்பது தெரியவந்தது. பின்னர், அவரை கைது செய்த காவல் துறையினர் விசாரணை மேற்கொண்டு வருகின்றனர்.
இதையும் படிங்க: சமூக வலைதளத்தில் கற்றுக்கொண்டு ஏடிஎம்மில் திருட முயன்றவர் கைது
