திண்டுக்கல்: 'மலைகளின் இளவரசி' என்று அழைக்கப்படும் கொடைக்கானல் பிரபலமான சுற்றுலாத்தலமாகும். நகர் பகுதி மற்றும் கிராமப்பகுதிகளில் சுற்றுலாப் பயணிகளின் மனதைக்கவர்வதற்காக நிறைய இடங்கள் இருந்தாலும் கொடைக்கானல் மலைப்பகுதி கிராமங்களில் சிறப்பாக விளங்குவது இங்கு இருக்கக்கூடிய மலைக்கிராம விவசாயம் தான். தரைத்தலங்களைப்போன்று அல்லாது மலைப்பகுதியில் விவசாயம் அடுக்கு விவசாயப் பகுதிகளாகவே இருக்கும்.
இந்த விவசாய நிலங்களில் மலைக்காய்கறிகளான உருளைக்கிழங்கு, கேரட், பீன்ஸ், வெள்ளைப்பூண்டு விவசாயம் இங்கு பிரசித்திபெற்ற விவசாயமாக இருந்து வருகிறது. மலைப்பகுதியில் விளையக்கூடிய காய்கறிகளுக்கு எப்போதுமே தனி மவுசும் பல இடங்களில் உண்டு. இதனை ஆங்கில காய்கறிகள் என்றும் கூட அழைப்பார்கள். தமிழர்களுக்கு என்று தனி பெருமையாக இருக்கக்கூடியதில் நெல் முக்கியப்பங்கு வகித்து வருகிறது. ஆனால், மலைப்பகுதியில் இதுவரை நெல் விவசாயம் பெரிய அளவில் செய்யப்படுவதில்லை. மலை நெல் விவசாயமும் அழிந்துவிட்டது.
கொடைக்கானலில் இருந்து சுமார் 40 கிலோ மீட்டர் தூரத்தில் அமைந்திருப்பது தான் பூண்டி என்ற இயற்கை எழில் கொஞ்சும் கிராமம். இங்கு இயற்கை விவசாயத்திற்குப் பஞ்சமே இருக்காது. நெல் விவசாயம் தரைத்தலங்களில் மட்டும் இருந்து வரக்கூடிய இந்த காலகட்டத்தில் மலைப்பகுதியில் மறைந்துபோன, இந்த ’’மலை நெல்’’ விவசாயத்தைத் தொடர்ந்து செய்து வருகிறது, பாரம்பரிய குடும்பம் ஒன்று. மலைப்பாங்கான விவசாய நிலத்தில் நெல் மணிகளைப் பயிரிட்டு பத்து மாதங்கள் அதனைப் பாதுகாத்து, தற்போது அறுவடைக்கும் தயாராக செய்திருக்கிறார்கள்.
தரைத்தலங்களில் இருக்கக்கூடிய நெற்பயிர்களுக்கும் மழைப்பகுதியில் தற்போது விளையக்கூடிய இந்த நெற்பயிர்களுக்கும் நிறைய வித்தியாசங்கள் இருந்து வருவதாக கூறப்படுகிறது. குறிப்பாக, தரை தலங்களில் இருக்கக்கூடிய நெற்பயிர்கள் மூன்று மாதங்களில் அறுவடைக்குத்தயாராகும். ஆனால் மலைப்பகுதியில் விளையக்கூடிய இந்த நெற்பயிர்கள் 10 மாதங்களுக்குப்பிறகு தான் அறுவடைக்குத் தயாராகிறது. விற்பனைக்காக செய்ய முடியாத நிலை இருந்தாலும் பாரம்பரியம் விட்டுப்போகக்கூடாது என்பதற்காக ஒவ்வொரு ஆண்டும் இந்த விவசாயத்தை மேற்கொண்டு தற்போது கடந்த ஏழு ஆண்டுகளாகத் தொடர்ந்து செய்து வருகிறார்கள்.
