நம் நாட்டில் உள்ள பழமை வாய்ந்த, தனிச்சிறப்பு மிக்க வரலாற்றுடைய தயாரிப்பு பொருட்களுக்குத் தனி அடையாளம் வழங்கும் விதமாக புவிசார் குறியீடு வழங்கப்பட்டு வருகிறது. இந்த புவிசார் குறியீட்டிற்கான சட்டம் இந்தியாவில் 2003ஆம் ஆண்டு கொண்டு வரப்பட்டது. ஒரு குறிப்பிட்ட இடத்தில் தயாரிக்கப்படும் அல்லது விளைவிக்கப்படும் பொருட்கள் தனிச்சிறப்பு பெற்றால், அவற்றிற்கு புவிசார் குறியீடு வழங்கப்படுகிறது. புவிசார் குறியீடு சட்டத்தின் கீழ் பதிவு செய்யப்பட்ட பொருளை வேறு ஒரு ஊரில் தயாரிக்கப்பட்ட பொருளாக விற்க முயன்றால், குற்றவியல் நடவடிக்கை எடுக்கப்படும்.
பூட்டு என்பது ஒரு பாதுகாப்பு கருவி... தமிழ்நாட்டில் பூட்டு என்றதும் நம் நினைவுக்கு வருவது திண்டுக்கல் பூட்டுதான். திண்டுக்கல் மாவட்டம் பூட்டு தயாரிப்பதற்கு பெயர் போன இடம். 150 ஆண்டுகள் பழமை வாய்ந்த திண்டுக்கல் பூட்டு தொடக்கத்தில் சங்கரலிங்க ஆசாரி என்பவரால் அழகிய வடிவமைப்புடன் தயாரிக்கப்பட்டது. அவரிடம் தொழிலைக் கற்றுக் கொண்டவர்கள் நீண்ட நாட்கள் உழைக்கும் வலிமை பொருந்திய திண்டுக்கல் பூட்டை தயாரிக்க ஆரம்பித்தனர். திண்டுக்கல் மாவட்டத்தில் நல்லாம்பட்டி, யாகப்பன்பட்டி, பாறைப்பட்டி புதூர், அனுமந்த நகர் உள்ளிட்ட பல பகுதிகளில் பூட்டு தயாரிப்பது ஒரு குடிசைத் தொழிலாக இருந்து வருகிறது.
திண்டுக்கல்லில் தண்ணீர் வறட்சியால் விவசாயம் இல்லாதபோது, மறு தொழிலாக உருவானதுதான் பூட்டுத் தொழில். இதன் தொடக்க காலத்தில் இரவு பகல் பார்க்காமல் பூட்டு செய்யும் தொழிலை குடிசைத் தொழிலாக செய்து வந்தனர். இயந்திரங்கள் வந்திருந்தாலும் திண்டுக்கல் பூட்டிற்கு இணையானது எதுவும் இல்லை என்பதே உண்மை. இந்நிலையில், 2013ஆம் ஆண்டு திண்டுக்கல் பூட்டு தொழிலாளர் சங்கத்தால், புவிசார் குறியீட்டுக்கு விண்ணப்பித்த நிலையில், தற்போது புவிசார் குறியீடு கிடைத்துள்ளது. இது தொழிலாளர்கள் மத்தியில் பெரும் மகிழ்ச்சியை ஏற்படுத்தியுள்ளது. இதேபோன்று 200 ஆண்டுகள் பழமை வாய்ந்த கண்டாங்கி சேலைக்கும் புவிசார் குறியீடு கிடைத்துள்ளது.
கண்டாங்கி சேலை முதலில் 'செட்டிநாடு பருத்தி சேலை' என்றே அழைக்கப்பட்டது. சிவகங்கை மாவட்டம் காரைக்குடியில் கண்டாங்கி சேலை தயாரிக்கப்பட்டது. இந்த சேலை 48 இன்ச், 5.5மீட்டர் நீளமும் கொண்ட கண்டாங்கி சேலையின் அழகே இரண்டுபக்க பார்டரே ஆகும். அந்த பார்டர்கள் பெண்களின் கெண்டைக் கால் பகுதியில் பளிச்சிடுவதால் அதனை கண்டாங்கி சேலை என்று அழைத்தனர். காலங்கள் மாறினாலும் கண்டாங்கி சேலையில் பார்டர்களை மாற்றாமல் தயாரித்து வருவதால்தான் அச்சேலைக்கு பெண்கள் மத்தியில் இன்றும் மவுசு குறையாமல் உள்ளது.
இதுகுறித்து, திண்டுக்கல் மாவட்டத்தின் பூட்டு தொழிலாளர்களின் சங்க செயலாளர் மனோகர பாண்டியன் கூறுகையில், 'மத்திய அரசு அறிவித்துள்ள புவிசார் குறியீடு கிடைத்தது மிகப்பெரும் ஊக்குவிப்பாக இருக்கிறது. இத்தொழில் தொடர்ந்து நலிந்து வந்த சூழலில், தற்போது அளிக்கப்பட்டுள்ள அங்கீகாரம் கைவினைப் பொருட்களுக்கு கிடைத்த புத்துணர்வு, வேறு எந்த பூட்டிற்கும் இல்லாத வகையில் சிறப்பு திண்டுக்கல் பூட்டிற்கு உள்ளது. முழுக்க முழுக்க கை வேலைப்பாடுகள் மிகுந்த பூட்டு. அதனால்தான் இன்றுவரை அதன் தரம் மாறாமல் இருக்கிறது. தொழில்நுட்ப வளர்ச்சி எத்தனை வேகமாக வளர்ந்தாலும் பழமைக்கு என்றுமே ஈடாகாது' என்றும் தெரிவித்தார்.
முன்னதாக தமிழ்நாட்டில் காஞ்சிபுரம் பட்டு, பவானி ஜமுக்காளம், மதுரை சுங்கடி சேலை, மல்லிப்பூ, சேலம் பட்டு சேலை, ஆரணி பட்டு சேலை, கோவை கோரா காட்டன் சேலை, தஞ்சாவூர் ஓவியம், தலையாட்டி பொம்மை, நாச்சியார் கோயில் குத்துவிளக்கு, பத்தமடை பாய், பழனி பஞ்சாமிர்தம் உள்ளிட்டவற்றிற்கு புவிசார் குறியீடு கிடைத்துள்ளது. அந்தவகையில், திண்டுக்கல் பூட்டு, கண்டாங்கி சேலைக்கும் புவிசார் குறியீடு கிடைத்திருப்பது அனைவரையும் மகிழ்ச்சியில் ஆழ்த்தியிருக்கிறது. இதன்மூலம் தமிழ்நாட்டிற்கு கிடைத்துள்ள புவிசார் குறியீடுகளின் எண்ணிக்கை 31ஆக உயர்ந்துள்ளது.
