தருமபுரி மாவட்டம் கம்பைநல்லூர் பகுதியைச் சேர்ந்த சுரேஷ்-நித்யா தம்பதியின் மகன் நிவாஸ் (5). இவருக்கு கடந்த சில நாட்களுக்கு முன்பு தொடர்ந்து உடல்நலக்குறைவு ஏற்பட்டு அங்குள்ள தனியார் மருத்துவமனையில் சிகிச்சைப் பெற்றுவந்தார். சிறுவன் நிவாஸின் ரத்தம் பரிசோதனைக்கு அனுப்பியதில் அவருக்கு டெங்கு காய்ச்சல் இருப்பது உறுதியானது.
இதனைத் தொடர்ந்து, நிவாஸின் பெற்றோர் அவரை அக்டோபர் 11ஆம் தேதி தருமபுரி அரசு மருத்துவக் கல்லூரி மருத்துவமனையில் டெங்கு சிறப்பு சிகிச்சைப் பிரிவில் சேர்த்தனர். டெங்கு சிறப்புப் பிரிவில் சிகிச்சைப் பெற்றுவந்த நிலையில், நிவாஸ் சிகிச்சைப் பலனின்றி உயிரிழந்தார். இந்நிலையில், நிவாஸின் பெற்றோர், உறவினர்கள் மருத்துவர்களின் அலட்சியப் போக்கே சிறுவனின் உயிரிழப்புக்கு காரணம் எனக் குற்றஞ்சாட்டினர்.
இது குறித்து சிறுவனின் தந்தை சுரேஷ் கூறுகையில், தனியார் மருத்துவமனையில் எடுக்கப்பட்ட ரத்தப் பரிசோதனையில் டெங்கு காய்ச்சல் இருப்பது தெரியவந்ததாகக் கூறினார். ஆனால், அரசு மருத்துவக்கல்லுரியில் எடுக்கப்பட்ட சோதனையில் டெங்கு இல்லை என மருத்துவா்கள் தெரிவித்து சிகிச்சை அளித்ததாக கண்ணீர் மல்க தெரிவித்தார்.
மருத்துவமனை நிர்வாகம் மீது குற்றச்சாட்டு எழுந்ததையடுத்து சிறுவன் மரணம் குறித்து அரசு மருத்துவக் கல்லுரி முதல்வர் சீனிவாசராஜ் அறிக்கை ஒன்றை வெளியிட்டுள்ளார்.
அதில், "அக்.11ஆம் தேதி மாலை 4.39 மணியளவில் சிறுவன் மருத்துவமனையில் குழந்தைநல தீவிர சிகிச்சைப் பிரிவில் அனுமதிக்கப்பட்டார். அவருக்கு ரத்த ஓட்டம், ரத்த தட்டுக்கள் குறைவாக இருந்தது. எலிசா சோதனையில் டெங்கு காய்ச்சல் அறிகுறிகள் ஏதும் இல்லை.
அக்டோபர் 16ஆம் தேதியன்று வலிப்பு, மூச்சுத்திணறல் ஏற்பட்டது. இதையடுத்து, அவருக்கு சுவாசக் கருவி பொருத்தப்பட்டது. இன்று கிருமி தொற்று காரணமாக ரத்த ஓட்ட தடை காரணமாக சிறுவன் நிவாஸ் உயிரிழந்தார்" எனக் குறிப்பிடப்பட்டுள்ளது.
