உள்ளாட்சித் தேர்தலுக்குத் தயாராகுங்க - கே.பி.அன்பழகன்

தருமபுரி: உள்ளாட்சித் தேர்தலுக்குத் தயாராக இருக்க வேண்டுமென உயர் கல்வித்துறை அமைச்சர் கே.பி.அன்பழகன் தலைமையில் நடைபெற்ற ஆலோசனைக் கூட்டத்தில் கட்சியினருக்கு அறிவுருத்தப்பட்டது.

தருமபுரி மாவட்ட அதிமுக அலுவலகத்தில் தருமபுரி நகரப்பகுதி அதிமுக பொறுப்பாளர்களுக்கான ஆலோசனைக் கூட்டம் உயர் கல்வித்துறை அமைச்சர் கே.பி.அன்பழகன் தலைமையில் நடைபெற்றது.

நிகழ்ச்சியில் பேசிய அமைச்சர், உள்ளாட்சி தேர்தல் எப்போது அறிவிக்கப்பட்டாலும் அதிமுகவினர் தேர்தலை சந்திக்க தயாராக இருக்கவேண்டும் என்றும் தேர்தலில் போட்டியிட விரும்புபவர்கள் அந்தந்தப் பகுதிகளில் ஒதுக்கப்பட்டுள்ள நிர்வாகிகளைச் சந்தித்து, ஆலோசனை செய்து போட்டியிடும் நபர்களை தேர்ந்தெடுத்து உறுதி செய்து கொள்ளவேண்டும் என்றும் அறிவுருத்தினார்.

தேர்தல் தேதி அறிவிக்கப்பட்டப் பின்பு கூட்டணி கட்சிகளுக்கு ஒதுக்கப்பட்ட இடங்களைத் தவிர அதிமுகவிற்கு ஒதுக்கப்பட்ட இடங்களில் போட்டியிட்டு அதிமுக கூட்டணி முழுமையான அளவில் வெற்றி பெற அனைவரது பணியும் இருக்கவேண்டும் எனவும் அன்பழகன் கேட்டுக்கொண்டார்.

இக்கூட்டத்தில் அதிமுகவின் ஒன்றிய செயலாளர்கள், நகரச் செயலாளர்கள், பொறுப்பாளர்கள் என அக்கட்சியின் நிர்வாகிகள் பலர் கலந்து கொண்டனர்.

இதையும் படிங்க: இரண்டாம் இன்னிங்ஸுக்கு தயாரான 'தளபதி 64'!