கடலூர் மாவட்டம் அண்ணாகிராமம் ஊராட்சி ஒன்றியம் திருத்துறையூரில் மயானபாதை அமைக்கக்கோரி கிராம மக்கள் நீண்ட காலமாக கோரிக்கை வைத்து வந்தனர். இந்த மயானத்திற்கு செல்லும் வழியில் உள்ள நிலப்பகுதி தமிழக வனத் துறையின் கட்டுப்பாட்டில் உள்ளதால் இங்கு மயான பாதை அமைப்பதில் தொடர்ந்து இழுபறி இருந்து வருகிறது.
இந்நிலையில் இந்த கோரிக்கையை வலியுறுத்தி சவபாடை ஊர்வலம் நடைபெற்றது. இந்த ஊர்வலத்திற்கு மார்க்சிஸ்ட் கம்யூனிஸ்ட் கட்சி ஒன்றிய செயலாளர் லோகநாதன் தலைமை தாங்கினார். மாநில குழு உறுப்பினர் மாதவன், திமுக பிரமுகர் மனோகர், விவசாய சங்க தலைவர் காந்தி, தமிழக வார்வுரிமை கட்சி பிரமுகர் இளந்திரையன் மற்றும் கிராம மக்கள், பெண்கள், இளைஞர்கள் திரளாக கலந்து கொண்டனர்.
தகவலறிந்து சம்பவ இடத்திற்கு விரைந்து வந்த பண்ருட்டி தாசில்தார் உதயகுமார், அண்ணா கிராமம் வட்டார வளர்ச்சி அலுவலர் சரவணன், புதுப்பேட்டை காவல் துறையினர் சவப்பாடை ஊர்வலம் நடத்தியவர்களுடன் பேச்சுவார்த்தை நடத்தினர். மேலும் கடலூர் கோட்டாச்சியர் முன்னிலையில் சம்மந்தப்பட்டத் துறை அதிகாரிகளுடன் பேசி பிரச்சனைக்கு தீர்வுகாண உரிய நடவடிக்கை எடுக்கப்படும் என அதிகாரிகள் உறுதி அளித்ததைத் தொடர்ந்து போராட்டத்தை கைவிட்டு அனைவரும் கலைந்து சென்றனர்.
இதையும் படிங்க:
பாடை ஊர்வலம், தலையில் ரத்தக்கட்டு' - 108 ஆம்புலன்ஸுக்காக நூதனப் போராட்டம்!
