கடலூர் மாவட்டம் கோதண்டராமாபுரத்தில் வசிப்பவர் முத்தையன்(58). பட்டியலினத்தைச் சேர்ந்தவரான இவருக்குச் சொந்தமாக உள்ள 13 ஏக்கர் நிலத்தில் விவசாயம் செய்து வருகிறார். இந்நிலையில், முத்தையன் மகள் திருமண செலவிற்காக 2015ஆம் ஆண்டு தன்னுடைய 52 சென்ட் நிலத்தை சீத்தாபதி என்பவரிடம் அன்றைய மதிப்பில் 4 லட்சத்து 25 ஆயிரம் ரூபாய்க்கு வாய்மொழியாக ஒப்பந்தம் போட்டு கிரயம் செய்து கொடுத்துள்ளார். அதன் பேரில் சீத்தாபதி அந்த நிலத்தில் பயிர் செய்து வந்துள்ளார். இந்நிலையில், 2018ஆம் ஆண்டு சீத்தாபதி முத்தயனிடம் திடீரென பணத்தை திருப்பிக் கேட்டு மிரட்டியுள்ளார்.
அதோடு மட்டுமின்றி, முத்தையனை குள்ளஞ்சாவடி பகுதிக்கு அழைத்துச் சென்று, சாதி பெயரை குறிப்பிட்டு இழிவுப்படுத்தி, 10 அடியாட்களை வைத்து அடித்து வெற்றுப்பத்திரத்தில் கையெழுத்து வாங்கியதாகவும், அவருடைய விவசாய நிலத்தில் உள்ள பயிர்களை எல்லாம் சேதப்படுத்தியதாகவும் சீத்தாபதி மீது குற்றச்சாட்டுகள் முன்வைக்கப்படுகிறது. இது குறித்து, முத்தையன் மனித உரிமை செயல்பாட்டு மையத்தை தொடர்பு கொண்டு வழக்கறிஞர் இல.திருமாணி உதவியுடன் மாவட்ட காவல் கண்காணிப்பாளரிடம் புகார் மனு அளித்துள்ளார். இந்த புகாரை விசாரிக்கும் நெய்வேலி துணை காவல் கண்காணிப்பாளர் ஒருதலைபட்சமாக செயல்படுவதால் தன்னுடைய உயிருக்கு பாதுகாப்பு வழங்கக்கோரி மீண்டும் மாவட்ட காவல் கண்காணிப்பாளர் சரவணனிடம் அவர் தற்போது புகார் மனு அளித்துள்ளார்.
