கடலூர் மாவட்டம் பண்ருட்டியை அடுத்த மேலிருப்பு கிராமத்தைச் சேர்ந்தவர் ராஜசேகர். இவருக்கு மனைவி சுகன்யா, தர்ணிகா(3) பெண் குழந்தையும் உள்ளது. ஆனால், கணவர் ராஜசேகர் குடித்துவிட்டு சுகன்யாவை அடிக்கடி அடித்து துன்புறுத்தி வந்துள்ளார். இதுமட்டுமின்றி பல பெண்களுடன் தொடர்பு இருப்பதாக கருதிய மனைவி சுகன்யா பண்ருட்டி காடாம்புலியூர் காவல் நிலையத்தில் கணவர் மீது புகார் கொடுத்துள்ளார். இந்த புகாரின் பேரில் இருவரையும் அழைத்து பேசிய காவல் துறையினர், சமாதானப்படுத்தி அனுப்பினர். மேலும், கிராமத்து பஞ்சாயத்தில் ராஜசேகர் இனி சுகன்யாவை அடிக்க மாட்டேன், துன்புறுத்த மாட்டேன் எனக் கடிதம் மூலம் ஒப்புதல் கொடுத்துள்ளார்.
இனிமேலாவது நமது வாழக்கை நலமாக போகும் என்ற நினைத்த சுகன்யாக்கு மீண்டும் சோதனை கிளம்பியது. முன்பு போலவே, ராஜசேகர் தொடர்ந்து சுகன்யாவை குடித்துவிட்டு வந்து அடித்து துன்புறுத்தியுள்ளார். அதன்பின்னர், டிக் டாக் செயலியில் பல பெண்களுடன் ஜாலியாக டிக்டாக் செய்து வந்துள்ளார். இதைப் பார்த்து கடுப்பான சுகன்யா, டிக் டாக் செய்யாதிர்கள் எனக் கூறியதற்கு, நான் அப்படித்தான் செய்வேன் என்னை உன்னால் ஒன்றும் செய்ய முடியாது எனக் கூறி சுகன்யாவை அடித்துள்ளார். இதை தொடர்ந்து, வேலைக்கு செல்வதாக கூறிவிட்டு வீட்டை விட்டு வெளியேறிய ராஜசேகர் பல நாட்களாகியும் வீட்டிற்கு திரும்பவில்லை. அவர்மீது உள்ள கோபத்தினால், ராஜசேகரை சுகன்யாவும் தேடவில்லை.
இந்நிலையில், புதுக்கோட்டையில் கவிநயா என்னும் பெண் காணவில்லை என அறந்தாங்கி காவல் நிலையத்தில் புகார் வந்துள்ளது. இந்த புகாரின் பேரில், விசாரணை தொடங்கிய காவல் துறையினர், கவிநயா தொலைபேசி எண்ணை ஆய்வு செய்ததில், ராஜசேகருக்கு தொடர்பு இருப்பதாக தெரியவந்தது. இதையடுத்து, ராஜசேகர் பெற்றோர்களிடமும், மனைவியிடமும் காவல் துறையினர் விசாரணை நடத்தினர். அப்போது, ராஜசேகர் பல நாட்களாக வீட்டிற்கு வரவில்லை என்ற தகவல் காவல் துறைக்கு தெரியவந்தது.
இந்த விசாரணையின்போது, கவிநயா ராஜசேகருடன் எடுத்துக்கொண்ட டிக்டாக் காணொலியை வெளியிட்டார். இதைப் பார்த்து அதிர்ச்சி அடைந்த மனைவி சுகன்யா மற்றும் காவல் துறையினர், கவிநயா ராஜசேகரும் திருமணம் செய்து கொண்டார்களா என்ற கேள்வி கிளம்பியுள்ளது. மேலும், அறந்தாங்கி காவல்துறையினர் விசாரித்து வருகின்ற சூழ்நிலையில் தற்போது ராஜசேகரின் மனைவியான சுகன்யா கடலூர் மாவட்ட காவல் கண்காணிப்பாளர் ஸ்ரீ அபிநவ்விடம் புகார் மனு அளித்தார். அதில், பல பெண்களின் வாழ்க்கையை சீரழித்து வரும் ராஜசேகரை உடனடியாக கண்டுபிடித்து உரிய நடவடிக்கை எடுக்க வேண்டும். பல தரப்பிலிருந்து எனக்கும் என் மூன்று வயது குழந்தைக்கும் மிரட்டல் வருகிறது எனவே உரிய பாதுகாப்பு அளிக்க வேண்டும் . இவ்வாறு அவர் தெரிவித்திருந்தார்.
டிக் டாக் செயலி மூலம் நடக்கும் குற்றங்களுக்கு முற்றுப்புள்ளி எப்போது என்ற கேள்வி மக்கள் மனதில் உள்ளது.
இதையும் படிங்க: வீட்டிற்குள் புகுந்து கத்தி முனையில் நகைக் கொள்ளை!
