கடலூர்: கடலூர் மாவட்டம் சிதம்பரத்தில் செயல்பட்டு வரும் அண்ணாமலை பல்கலைக்கழகத்தில் அளவுக்கு அதிகமாகப் பணி நியமனங்கள் உள்ளிட்ட பல்வேறு பிரச்சினைகளால் கடந்த 2012ம் ஆண்டு பல்கலைக்கழகத்தில் கடும் நிதி சிக்கல் உள்ளிட்ட பல்வேறு பிரச்சினைகள் ஏற்பட்டது. இதைத் தொடர்ந்து அதே ஆண்டு இறுதியில் தற்போது தமிழக அரசின் முதன்மை செயலாளராக உள்ள சிவதாஸ் மீனா பல்கலைக்கழக தனி அலுவலராகத் தமிழக அரசால் நியமிக்கப்பட்டார்.
அவரின் அறிக்கையின்படி கடந்த 2013ம் ஆண்டு அப்போதைய தமிழக முதல்வராக இருந்த ஜெயலலிதா பல்கலைக்கழகத்தை அரசு கட்டுப்பாட்டில் கொண்டு வந்தார். தொடர்ந்து பல்கலைக்கழகத்தைச் சீர்படுத்தும் பணியில் சிவதாஸ் மீனா ஈடுபட்டு பல்கலைக்கழகத்தில் உள்ள மிகையான பேராசிரியர்கள், அலுவலர்கள், ஊழியர்கள் உள்ளனர். அவர்களை பல்வேறு இடங்களுக்குப் பணி நிரவல் செய்தால் நிதி சிக்கல் தீரும் என்று அரசுக்கு அறிக்கை அனுப்பி வைத்தார்.
இந்த நிலையில் தமிழக அரசால் பல்கலைக்கழக நிர்வாகம் துணைவேந்தர் கட்டுப்பாட்டுக்குக் கொண்டுவரப்பட்டது. கடந்த 2014ஆம் ஆண்டு முதல் 9 ஆண்டுகளாகப் பல்கலைக்கழகத்திலிருந்து பேராசிரியர்கள் உதவிப் பேராசிரியர்கள், அலுவலக உதவியாளர்கள், அலுவலர்கள், தமிழகத்தில் உள்ள அரசு கல்லூரிகள், அரசு அலுவலகங்கள், தலைமைச்செயலகம் உள்ளிட்ட பல்வேறு அரசு அலுவலகங்களுக்கு பணி நிரவல் செய்யப்பட்டனர்.
இத்தகைய சூழ்நிலையில் பல்கலைக்கழகத்தில் தணிக்கை குழு ஆய்வு மேற்கொண்ட போது உதவிப் பேராசிரியர்களுக்குரிய அடிப்படைத் தகுதி இல்லாமல் பல்வேறு துறைகளில் உதவிப் பேராசிரியர்கள் இருப்பது தெரிய வந்தது. இது குறித்து பல்கலைக்கழக ஆட்சிக்குழு கூட்டத்திலும் தீர்மானம் நிறைவேற்றப்பட்டு, உயர் கல்வித்துறைக்குத் தகவல் தெரிவித்து அதன் வழிகாட்டலின் படி எம்பிஏ, பொருளாதாரம், வரலாறு, கணினி அறிவியல், விவசாயம் உள்ளிட்ட பல்வேறு துறைகளைச் சாந்த 56 உதவிப் பேராசிரியர்களைப் பணி நீக்கம் செய்ய உத்தரவிடப்பட்டுள்ளது.
இதன் அடிப்படையில் தற்பொழுது அண்ணாமலை பல்கலைக்கழக வளாகத்தில் பணியாற்றி வரும் 18 உதவி பேராசிரியருக்குப் பல்கலைக்கழக நிர்வாகம் நேற்று (நவ 15) இரவு முதல் பணி நீக்க உத்தரவு வழங்கப்பட்டுள்ளதாகவும், பணி நிரவலில் சென்று வெளி கல்லூரிகளில் பணியாற்றி வரும் 38 பேருக்கு கல்வித்துறை இயக்குநர் அலுவலகம் மூலம் பணி நீக்க உத்தரவு வழங்கப்பட உள்ளதாகவும் தகவல் தெரிவிக்கப்பட்டுள்ளது. இந்த அறிவிப்பு பெரும் பரபரப்பை ஏற்படுத்தி உள்ளது என்பது குறிப்பிடத்தக்கதாகும்.
இதையும் படிங்க: 10 லட்சம் பேருக்கு 100 இளங்கலை மருத்துவ இடங்கள் அறிவிப்பை நிறுத்தி வைப்பு!
