கோயம்புத்தூர் மாவட்டம், பொள்ளாச்சி அருகே உள்ள வீரல்பட்டி கிராமத்தில் இரண்டாயிரத்திற்கும் மேற்பட்ட கிராம மக்கள் வசித்து வருகின்றனர். இப்பகுதி மக்கள் விவசாய நிலங்களையும், கால்நடைகளை வளர்த்தும் தங்களின் வாழ்வாதாரத்தை நடத்தி வருகின்றனர்.
இந்நிலையில், கிராமத்தை ஒட்டி கோழிப் பண்ணை அமைக்கும் பணிகள் நடைபெற்று வருகின்றது. அப்பகுதியில், கோழிப்பண்ணை அமைத்தால் சுகாதாரச் சீர்கேடும், விவசாய நிலங்களும் பாதிக்கப்படும் என கிராம மக்கள் கோழி பண்ணை அமைக்க எதிர்ப்பு தெரிவித்து மாவட்ட நிர்வாகத்தில் பல்வேறு அதிகாரிகளுக்கு பலமுறை மனு கொடுத்தும் இதுவரை எந்தவித நடவடிக்கையும் எடுக்கப்படவில்லை எனத் தெரிகிறது.
இந்நிலையில், கோழிப்பண்னை அமைக்கக் கூடாது என எதிர்ப்புத் தெரிவித்து பொதுமக்கள் ஊராட்சி மன்ற அலுவலகத்தை முற்றுகையிட்டும், அலுவலகம் முன்பு அமர்ந்து தர்ணா போராட்டத்திலும் ஈடுபட்டனர். மேலும், தற்போது அமைக்கப்படும் கோழி பண்ணை தாய்க் கோழி பண்ணையாகும். லட்சக்கணக்கான கோழிகள் உற்பத்தி செய்யும் வகையில் அமைக்கப்படுகிறது.
இதனால் குழந்தைகள் முதல் பெரியோர் வரை நுரையீரல் பிரச்னை , சுவாசக் கோளாறு, வயிற்றுப்போக்கு போன்ற பல்வேறு நோய்கள் ஏற்பட வாய்ப்புள்ளது. மேலும், சுற்றுவட்டார கிராமங்களும் சுகாதாரச் சீர்கேட்டால் பாதிக்கப்படும். எனவே, கோழிப் பண்ணை அமைக்க அரசு அனுமதி அளிக்கக்கூடாது என பொதுமக்கள் கோரிக்கை விடுத்துள்ளனர்.
இதையும் படிங்க: சாலையில் தேங்கிய மழை நீரில் நாற்று நடும் போராட்டம்
