'உணவு உற்பத்திக்கு ஒருங்கிணைந்த விவசாயம் தேவை' - தமிழ்நாடு வேளாண்மைப் பல்கலைக்கழக துணைவேந்தர்!

கோவை: கல்லூரி பட்டமளிப்பு விழாவில் பங்கேற்ற தமிழ்நாடு வேளாண்மைப் பல்கலைக்கழக துணைவேந்தர் குமார், பெருகி வரும் மக்கள் தொகைக்கு ஏற்ப உணவு உற்பத்தியை சமாளிப்பதற்கு ஒருங்கிணைந்த விவசாயம் தேவை என்று தெரிவித்தார்.

கோவை மாவட்டம், பொள்ளாச்சி அருகே இயங்கி வரும் மணக்கடவு தனியார் வேளாண்மைக் கல்லூரியில் பட்டமளிப்பு விழா நடைபெற்றது. இதில் தமிழ்நாடு வேளாண்மைப் பல்கலைக்கழக துணைவேந்தர் குமார் சிறப்பு விருந்தினராகக் கலந்து கொண்டார். மேலும், இளநிலை, முதுநிலையைச் சேர்ந்த 240 மாணவர்களுக்கு பட்டங்களை வழங்கினார்.

பின்னர் செய்தியாளர்களைச் சந்தித்த அவர், ' தற்போது பெருகி வரும் மக்கள் தொகைக்கு ஏற்ப உணவு உற்பத்தியை பெருக்க வேண்டிய நிலை உருவாகியுள்ளது. மக்கள் தேவைக்கு ஏற்ப உரங்களைப் பயன்படுத்த வேண்டும். இயற்கை விவசாயம் நல்லது தான். ஆனால், சில நேரங்களில் அதிலிருந்து வரும் பூச்சிகள் மற்ற விவசாய நிலங்களுக்கும் பரவி நோய்கள் பரவும் அபாயம் உள்ளது. பெருகிவரும் மக்கள் தொகைக்கு ஏற்ப உணவுகளைத் தயாரிப்பதற்கு ஒருங்கிணைந்த விவசாயம் தேவைப்படும்’ என்றார்.

மேலும், ' வேளாண்மை கல்வி என்பது மதிப்புமிக்க அறிவியலில் ஒன்றாகும். வேளாண் பாடத்திட்டம் பல துறைகளை உள்ளடக்கியது. கடந்த 10 ஆண்டுகளுக்கு முன்பு பொறியியல் படிப்பிற்கு இருந்த வரவேற்பு குறைந்து, தற்போது மாணவர்கள் வேளாண்மைத் துறையை நோக்கி வரத் தொடங்கியுள்ளனர். 2019-20ஆம் ஆண்டுக்கு 52 ஆயிரம் மாணவர்கள் வேளாண் படிப்பிற்கு விண்ணப்பித்தனர். பொங்கலுக்கு வேளாண்மைப் பல்கலைக் கழகம் சார்பில் புதிய ரகங்கள் அறிமுகப்படுத்தப்படும்' என்று தெரிவித்தார்.

இதையும் படிங்க: ‘வாக்காளர்களைப் பலமுறை சந்தித்து வாக்கு கேட்க வேண்டும்’ - அரசுத் தலைமை கொறடா அறிவுரை!