கோயம்புத்தூர் தெற்கு சட்டப்பேரவைத் தொகுதியில் பாஜக சார்பில் அக்கட்சியின் தேசிய மகளிர் அணித் தலைவர் வானதி சீனிவாசன் போட்டியிடுகிறார். மார்ச் 15ஆம் தேதி தனது வேட்புமனுவைத் தாக்கல்செய்த அவர் தற்போது பரப்புரை பயணத்தில் மும்முரமாக ஈடுபட்டுவருகிறார். இன்று ராஜவீதி பகுதியில் உள்ள தேர்நிலைத் திடலில் ஆட்டோ ஓட்டுநர்களுடன் சேர்ந்து மதிய உணவருந்தி மத்திய அரசின் இன்சூரன்ஸ் குறித்து எடுத்துரைத்தார்.
அதன் பின் அப்பகுதியில் தேர்தல் பரப்புரையை மேற்கொண்ட அவர், "தற்போது பாஜக அதிமுக கூட்டணியில் நான் நிற்கிறேன். இந்தத் தொகுதியில் ஒருபுறம் காங்கிரஸ் கட்சியும் மறுபுறம் கோவைக்காகப் பேசாத கோவை மக்கள், பாரம்பரியம், கலாசாரம், பண்பாட்டை பற்றி அறியாத ஒருவர் நிற்கிறார் " என மக்கள் நீதி மய்யம் தலைவர் கமல் ஹாசனை சுட்டிக் காட்டினார்.
தொடர்ந்து "திடீரென வாக்கிங் போறாரு, ஜாக்கிங் போறாரு, கம்பு சுத்துறாரு, பை ஸ்டார் ஹோட்டலில் தங்கி இருக்காரு அப்புறம் பாத்தா ஆட்டோவில் போறாரு" என்று அவரைக் கிண்டல்செய்தார்.
மேலும், கோவை தெற்கு தொகுதியில் மக்கள் சேவை மையத்தின் மூலம் 25 ஆயிரம் குடும்பங்களுக்கு ஐந்து லட்சம் ரூபாய் மதிப்பில் மருத்துவ காப்பீட்டு அட்டையை வழங்கி இருக்கிறேன் என்றும் தெரிவித்தார்.
முன்னதாக அவர் தனது இரண்டு நாள் தேர்தல் பரப்புரையின்போது, நடந்து சென்றார்; ஆட்டோவில் சென்றார்; ட்விட்டரில் அஜித் ரசிகரிடம் தான் வெற்றிபெற்ற உடனேயே வலிமை பட அப்டேட் தர்றேன் என்றார். மக்களோடு மக்களாக அமர்ந்து சிக்கன் பிரியாணி சாப்பிட்டார் என்பது குறிப்பிடத்தக்கது.
