ஈரோடு மாவட்டம் சத்தியமங்கலத்தில் இருந்து கோவைக்கு இன்று காலை 6.30 மணி அளவில் அரசு விரைவுப் பேருந்து ஒன்று சென்று கொண்டிருந்தது. இந்த பேருந்து அன்னூர் அருகே சென்றுகொண்டிருந்தபோது, எதிரே வந்த இருசக்கர வாகனம் கட்டுபாட்டை இழந்து நிலைதடுமாறியதால், அதைப் பார்த்த பேருந்து ஓட்டுநர் இருசக்கர வாகனத்தின் மீது மோதாமல் இருக்க திருப்பிய போது, சாலையோரம் இருந்த பள்ளத்தில் கவிழ்ந்து விபத்துக்குள்ளானது.
இதில் பேருந்தில் இருந்த பயணிகளில் இருவர் படுகாயமடைந்தனர். மேலும் 10 பயணிகளுக்கு லேசான காயம் ஏற்பட்டது. தகவலறிந்து சம்பவ இடத்திற்கு வந்த காவல் துறையினர், காயமடைந்தவர்களை அருகில் இருந்த மருத்துவமனைக்கு அனுப்பி வைத்தனர். பின்னர் இதுதொடர்பாக வழக்குப் பதிவு செய்து விசாரணை மேற்கொண்டு வருகின்றனர். இந்த விபத்தால் அப்பகுதியில் சிறிது நேரம் போக்குவரத்து பாதிக்கப்பட்டது.
