தமிழ்நாட்டில் தென்னை விவசாயிகளின் கோரிக்கையை ஏற்று தென்னை விவசாயிகள் உற்பத்தி செய்யும் ஒரு கிலோ கொப்பரைத் தேங்காய்க்கு ஆதார விலையாக ரூ. 95.21 காசு நிர்ணயம் செய்து கொள்முதல் செய்ய தமிழ்நாடு அரசு உத்தரவு பிறப்பித்துள்ளது.
அதன்படி தமிழ்நாடு முழுவதும் வேளாண் உற்பத்தியாளர் கூட்டுறவு விற்பனை சங்கங்களில் கொப்பரைக் கொள்முதல் மையம் தொடங்கப்பட்டுள்ளது.
பொள்ளாச்சியில் நடந்த நிகழ்வில் தமிழ்நாடு உள்ளாட்சித் துறை அமைச்சர் வேலுமணி, சட்டப்பேரவை துணை சபாநாயகர் பொள்ளாச்சி ஜெயராமன் ஆகியோர் கலந்துகொண்டு கொள்முதல் மையத்தை தொடங்கிவைத்தனர்.
மேலும் அரவை ரக கொப்பரைத் தேங்காய்களுக்கு 95 ரூபாய் 21 காசும், பந்து வகை கொப்பரைத் தேங்காய்களுக்கு 99 ரூபாயும் நிர்ணயம் செய்யப்பட்டு இந்த மையத்தின் உதவியுடன் மத்திய அரசு நிறுவனமான நேபட் மூலம் கொள்முதல் செய்யப்படும் என்றும், இதனால் தென்னை விவசாயிகள் பயன் பெறுவார்கள் என்றும் உள்ளாட்சித் துறை அமைச்சர் வேலுமணி செய்தியாளர்களிடம் தெரிவித்தார்.
இந்தாண்டு தொடங்கப்பட்டுள்ள இந்த மையத்தில் நவம்பர் மாதம் வரை விவசாயிகளிடமிருந்து நேரடியாக கொப்பரையை கொள்முதல் செய்து விவசாயிகளின் வங்கிக் கணக்கில் பணத்தை செலுத்த நடவடிக்கை எடுக்கப்பட்டுள்ளதாக அலுவலர்கள் தெரிவித்தனர். பொள்ளாச்சியில் கொப்பரைக் கொள்முதல் மையம் தொடங்கியது தென்னை விவசாயிகளிடையே மகிழ்ச்சியை ஏற்படுத்தியுள்ளது
.
