கோயம்புத்தூர்: சிறுமுகை அருகே திம்மராயம்பாளையம் கிராமம் உள்ளது. மேற்கு தொடர்ச்சி மலை அடிவாரத்தில் பவானி ஆற்றுப் படுகையில் உள்ள இந்த கிராமத்தில் விவசாயம் பிரதான தொழிலாக உள்ளது. மேலும், இந்தபகுதி மக்கள் அதிகளவில் பெருமாளை வழிபடுவது வழக்கம். கோவை மாவட்டத்தில் உள்ள வைணவத் தலங்களில் மிகவும் பிரசித்தி பெற்ற காரமடை அரங்கநாதர் கோயில் உள்ளதால் அதனைச் சுற்றியுள்ள மக்கள் வைணவத்தில் அதிக நம்பிக்கை கொண்டுள்ளனர்.
இந்நிலையில், திம்மராயம்பாளையம் கிராமத்தில் உள்ள ஓய்வு பெற்ற ஆசிரியை மாரம்மாள் என்பவரது தோட்டத்தில் கருடன் இறந்து கிடப்பதாக ஊர் மக்களுக்கு தகவல் தெரிவிக்கப்பட்டது. இதனையடுத்து உயிரிழந்த கருடனை ஐதீகப்படி நல்லடக்கம் செய்ய கிராம மக்கள் முடிவு செய்தனர்.
தொடர்ந்து கிராம மக்கள் இணைந்து தேர் கட்டி அதில் கருடன் உடலை வைத்து ஊர்வலமாக எடுத்து சென்றனர். அப்போது பின்னால் வந்த கிராம மக்கள் ‘கோவிந்தா கோவிந்தா’ என கோசம் எழுப்பியவாறு ஊர்வலமாக சென்றனர். பின்னர் கிராமத்தில் உள்ள மாரியம்மன் கோயில் அருகே கருடன் உடல் மீது நெய் ஊற்றி எரியூட்டினர். தொடர்ந்து எரிந்த சாம்பலை எடுத்து சென்று அருகே உள்ள பவானி ஆற்றில் கரைத்தனர்.
இது குறித்து கிராம மக்கள் கூறுகையில், இந்த பகுதி மக்கள் அதிகளவில் பெருமாளை வழிபடுகிறார்கள் கருடன் இறந்த சம்பவத்தை அடுத்து பெரியவர்களின் அறிவுறைப்படி கருடனை முறைப்படி அடக்கம் செய்ய முடிவு செய்யப்பட்டு மனிதர்கள் உயிரிழந்தால் எவ்வாறு நல்லடக்கம் செய்யப்படுமோ அதுபோல் தேர் கட்டி அதில் உடலை வைத்து எடுத்து சென்றோம். அப்போது காரமடையில் இருந்து வரவழைக்கப்பட்ட தாசர்கள் சங்கு, சேகிண்டி முழங்க ஊர்வலம் சென்றது.
இவ்வாறு செய்தால் ஊர் செழிக்கும் தண்ணீர் பஞ்சம் வராது என்பது ஐதீகம். 10 ஆண்டுகளுக்கு முன்னர் இது போன்ற சம்பவம் நடைபெற்றதால் முன்னோர் அறிவுரைப்படி நல்லடக்கம் செய்யப்பட்டதாக தெரிவித்தனர்.
இதையும் படிங்க:மேட்டூர் அருகே மூதாட்டியை கொன்றுவிட்டு நகை, பணம் கொள்ளை.. மோப்பநாய் உதவியுடன் போலீசார் விசாரணை!
