சென்னை: பாஜக தேசிய மகளிரணி தலைவியும், கோயம்புத்தூர் தெற்கு தொகுதி சட்டப்பேரவை உறுப்பினருமான வானதி சீனிவாசன் டெல்லி செல்லும் முன் சென்னை விமானநிலையத்தில் இன்று (ஜூன்.3) செய்தியாளர்ளைச் சந்தித்துப் பேசினார்.
அப்போது அவர் கூறியதாவது; “தமிழ்நாட்டில் இரண்டு நாள்கள் தடுப்பூசி போட முடியாத நிலை ஏற்படும் என சுகாதாரத்துறை செயலாளர் தெரிவித்தார். மத்திய அரசு 4.20 லட்சம் தடுப்பூசிகளை தந்தது. இதில் சென்னைக்கு அடுத்தப்படியாக, கோயம்புத்தூருக்கு அதிகமான தடுப்பூசிகள் ஒதுக்கப்பட்டு, அதிகமான இடங்களில் ஊசி போடும் பணி தொடங்கப்பட்டு உள்ளது. இதற்காக மத்திய அரசுக்கும், மாநிலத்தின் முதலமைச்சருக்கும், கோயம்புத்தூருக்கு அதிகமாக தடுப்பூசிகளை அனுப்பிய மாநில சுகாதார துறை அமைச்சருக்கும் நன்றியை தெரிவித்து கொள்கிறேன்.
சி.பி.எஸ்.இ 12ஆம் வகுப்பு மாணவர்களுக்கு பொது தேர்வு ரத்து செய்யப்பட்டு உள்ளது. பல்வேறு மாநிலங்கள் 12ஆம் வகுப்பு தேர்வை ரத்து செய்து உள்ளன. தமிழ்நாட்டிலும் மாணவர்கள் உடல் நலனை கருத்தில் கொண்டு 12ஆம் வகுப்பு தேர்வை ரத்து செய்ய வேண்டும். இந்த கருத்தை தான் பாஜக மாநில தலைவர் முருகனும் கூறியுள்ளார். ஒவ்வொரு நாளும் தேர்வு நடக்குமா? நடக்காதா? என்று மாணவர்களும், பெற்றோர்களும் தவித்து கொண்டுள்ளனர். இந்த விவகாரத்தில் அரசு உடனடியாக முடிவு எடுக்க வேண்டும்.
பல்வேறு புதிய திட்டங்களுக்கும், நலத்திட்ட உதவிகளையும் முதன்முறையாக முதலமைச்சர் தொடங்கி வைத்து பயனாளிகளுக்கு வழங்கி உள்ளார். முன்கள பணியாளர்களுக்கு இழப்பீடு தொகை வழங்கும் பணியும் நடந்துள்ளது.
இதில் தூய்மை பணியாளர்களும் இணைக்கப்பட வேண்டும். கரோனா தொற்றின் தாக்கம் கிராமப்புறங்களில் பரவி உள்ளதால் ஊராட்சி, பேரூராட்சி பகுதிகளிலும் உள்ள தூய்மை பணியாளர்களும் ஒப்பந்த பணியாளர்களாக தூய்மை பணியாற்றும் அவர்களும் சேர்க்கப்பட்டு இழப்பீட்டு தொகையை மாநில அரசு வழங்க வேண்டும்.
பிரமாணர்கள் எதிரி என்று நீதிக் கட்சி காலத்திலிருந்து எடுத்து செல்லப்படுகிறது. பட்டியல் இனத்தவர்களை சாதி ரீதியாக குறிப்பிடுவது தவறு என சட்டத்தில் இருக்கிறது. பிற்படுத்தப்பட்டவர்களாக இருந்தாலும், முற்படுத்தப்பட்ட சமுதாயமாக இருந்தாலும் சாதி பெயரை சொல்லி இழிவுப்படுத்துவது கூடாது.
இன்றைய சூழலில் பாதுகாப்பாக மாணவர்கள் தேர்வு எழுத முடியுமா?. கரோனா தொற்று பாதிப்பு அதிகமாக இருக்க கூடிய மாநிலம் தமிழ்நாடு என்பதால் இதை நாம் சற்று சிந்தித்துப்பார்க்க வேண்டும். செங்கல்பட்டு தடுப்பூசி மையம் திறப்பது குறித்து முதலமைச்சரின் கடிதத்தை மத்திய அரசு பரிசீலிக்கிறது. டெல்லியில் பாஜக தேசிய தலைவர்களைச் சந்தித்து தமிழ்நாட்டிற்கு எது அவசிய தேவையாக உள்ளதோ அதை வலியுறுத்துவேன்” என தெரிவித்தார்.
இதையும் படிங்க: திடீர் பணிநீக்கம் செய்யப்பட்ட ஆயுஷ் மருத்துவர்களுக்கு மீண்டும் பணி நியமனம்!
