மக்னா யானையை பிடிக்க களமிறங்கிய கும்கி 'சின்னதம்பி'

இரண்டாவது நாளாக கோவை மாநகருக்குள் சுற்றி வரும் மக்னா யானையால் பொதுமக்களுக்கு பாதிப்பின்றி கும்கி யானை சின்னதம்பியை வைத்து பிடிக்க வனத்துறையினர் திட்டமிட்டுள்ளனர்.

கோயம்புத்தூர்: தருமபுரி பகுதியில் வனப்பகுதிக்குள் செல்லாமல் விவசாய பயிர்களைச் சேதப்படுத்தி வந்த மக்னா யானையைக் கடந்த 5 ஆம் தேதி கும்கி யானை உதவியுடன் மயக்க ஊசி செலுத்தி பிடிக்கப்பட்டது. பின்னர் 6 ஆம் தேதி கோவை பொள்ளாச்சி அருகே உள்ள டாப்சிலிப் வனச்சரகத்திற்கு உட்பட்ட வரகழியாறு வனப்பகுதியில் விடுவிக்கப்பட்டது. மேலும் அந்த யானையை வனத்துறையினர் தொடர்ந்து கண்காணித்து வந்தனர்.

கடந்த 10 நாட்களாக வனப்பகுதிக்குள் சுற்றித் திரிந்த மக்னா யானை, சேத்துமடை பகுதிக்குச் சென்றது. நேற்று முன்தினம் முதல் பொள்ளாச்சியிலிருந்து கிட்டத்தட்ட 150 கிலோமீட்டருக்கு மேல் பல்வேறு பகுதியில் சுற்றி நேற்று கோவை பாலக்காடு சாலையில் உள்ள மதுக்கரை பகுதிக்கு வந்தது. பின்னர் மதுக்காரையிலிருந்து குனியமுத்தூர் பி.கே புதூர் பகுதியில் காலை முதல் இரவு வரை ஒரே பகுதியில் நின்றது.

அதைத் தொடர்ந்து நேற்று இரவு பிகே புதூர் பகுதியிலிருந்து இடையர்பாளையம் பகுதிக்குச் சென்றது மக்னா யானை. பின் இரவு அங்குள்ள தோட்டத்தில் உள்ள வாழை மரங்கள் மற்றும் தென்னை மரங்களைச் சேதப்படுத்தியது. நேற்று இரவு 4 மணி வரை வனத்துறையினரின் கண்பார்வையிலிருந்த யானை 4 மணிக்கு மேல் வனத்துறையினர் கண்காணிப்பிலிருந்து விலகியது. தொடர்ந்து இன்று காலை 6:00 மணி அளவில் மீண்டும் செல்வபுரம், புட்டு விக்கி பகுதியில் வனத்துறையினர் கண்காணிப்பில் வந்தது.

இன்று காலை 6 மணி முதல் புட்டு விக்கி பகுதியிலிருந்து நகரின் முக்கிய பகுதியான செல்வபுரம் பகுதி வரை சென்று தெலுங்கு பாளையம் வந்து, பின்னர் பேரூர் வந்தடைந்துள்ளது. பேரூர் எஸ்.எம்.எஸ் கல்லூரி அருகே தற்போது வந்துள்ள யானையை வனத்துறையினர் கண்காணித்து வருகின்றனர். யானை தோட்டத்திற்குள் சமதள பகுதியில் இருப்பதால் யானையை இந்த பகுதியில் வைத்து யானைக்கு மயக்க ஊசி செலுத்திப் பிடிக்க வனத்துறையினர் திட்டமிட்டுள்ளனர்.

மேலும் யானை நகர் பகுதியில் சென்றால் ஆபத்தான சூழல் நிலவும் என்பதால், தற்போது பேரூர் எஸ்.எம்.எஸ் கல்லூரி அருகே சின்னதம்பி என்ற கும்கி யானை வரவழைக்கப்பட்டுள்ளனர். கும்கி யானை வந்தவுடன் மயக்க ஊசி செலுத்திப் பிடிக்க முடிவு செய்துள்ளனர். மேலும் மருத்துவ குழுவினர் தற்போது சம்பவ இடத்திற்கு வந்து கொண்டுள்ளனர். மேலும் 2 கும்கி யானைகள் தேவைப்பட்டால் அழைத்துக் கொள்ளப்படும் என அதிகாரிகள் தெரிவிக்கின்றனர்.