கோவை: t23 புலி ஆட்கொல்லி புலி இல்லை என முதுமலை புலிகள் காப்பக வெளி மண்டல துணை இயக்குநர் அருண் குமார் தெரிவித்துள்ளார்.
நீலகிரி மாவட்டம் முதுமலை புலிகள் காப்பக வெளி மண்டல துணை கள இயக்குநர் அருண்குமார் செய்தியாளர்களுக்கு பேட்டியளித்தார். அப்போது பேசிய அவர், t23 புலியை பின்தொடர்வது முதலில் சவாலாக இருந்தது. நேற்றிலிருந்து t23 புலியை பின் தொடர்கின்றோம், புதர் அதிகமாக இருப்பதால் அதை பிடிப்பதில் சிரமம் உள்ளது.
புலி இருக்கும் இடத்தை நான்கு மருத்துவ குழுவினர் தொடர்ந்து கண்காணித்து வருகின்றனர். வன புதர்களில் அடிக்கடி பதுங்கிக்கொள்கிறது. புலியை பிடிக்கும் வியூகத்தை மாற்றி இருக்கின்றோம்.
4,5 இடங்களில் பரண் அமைத்து கண்காணித்து வருகிறோம். இன்று காலை முதல் பரண்களில் இருந்து மயக்க மருந்து செலுத்தி புலி பிடிக்கப்படும்,புலியின் உடல்நிலை தற்போது நன்றாக உள்ளது. வனப்பகுதியில் எருமையை கொன்றது t23 புலியா என்பதை இன்றுதான் உறுதிப்படுத்த முடியும். 50 கண்காணிப்பு கேமராக்கள் பொருத்தப்பட்டுள்ளது; கூடுதலாக 35 இடங்களில் கேமரா பொருத்தப்பட உள்ளது.
சிங்கார பகுதிகளில் கூடுதல் கேமராக்கள் பொருத்தப்பட இருக்கிறது. தினமும் காலை 7 மணிக்கு முன்பாக கேமராக்கள் ஆய்வு செய்யப்படும் கேரள வனத்துறை குழு திரும்ப வருகின்றனர். கூடுதலாக இரு மருத்துவர்கள் இந்த ஆபரேஷனில் சேர்க்கப்பட்டுள்ளனர்.
புலி நடமாட்டம் இருக்கும் பகுதிகளில் மக்களுக்கு உள்ளாட்சி அமைப்புகள் மூலம் எச்சரிக்கை விடுக்கப்பட்டுள்ளது. இந்த புலியை ஆட்கொல்லி புலி என வரிசையில் கொண்டு வர முடியாது. இந்த ஆபரேஷனில் மோப்ப நாய்களின் பணி மிகவும் பயனுள்ளதாக இருக்கிறது. எந்த நேரத்திலும் புலி பிடிபட வாய்ப்பு உள்ளது என்றார்.
இதையும் படிங்க: லக்கிம்பூர் விவசாயிகள் மீது கார் ஏறிய அதிர்ச்சி காட்சி!
