இசையமைப்பாளருக்கே டஃப் கொடுக்கும் கோயில் யானை: மவுத் ஆர்கன் வாசித்து அசத்தல்

கோவை: தமிழ்நாடு அரசு இந்து சமய அறநிலையத் துறை சார்பில் நடக்கும் யானைகள் சிறப்பு நல்வாழ்வு முகாமில் கலந்துகொண்ட கோயில் யானை, மவுத் ஆர்கன் வாசித்து அசத்தியுள்ளது.

கோவை மாவட்டம் மேட்டுப்பாளையம் வனபத்ரகாளியம்மன் கோயில் அருகில் தேக்கம்பட்டி பவானி ஆற்றுப்படுகையில் தமிழ்நாடு அரசு இந்து சமய அறநிலையத் துறை சார்பில் 12ஆவது யானைகள் சிறப்பு நல்வாழ்வு முகாம் கடந்த மாதம் 15ஆம் தேதி முதல் நடைபெற்றுவருகின்றது. முகாமில் 28 யானைகள் புத்துணர்வு பெற்றுவருகின்றன.

இந்நிலையில் முகாமில் கலந்துகொண்ட யானைகள் ஒவ்வொன்றும் ஒவ்வொரு தனிச் சிறப்புகளை தன்னகத்தே கொண்டு சிறப்புப்பெற்று விளங்குகிறது. இதில், திருவண்ணாமலை மாவட்டம் போளூர்வட்டம் அருள்மிகு யோக ராமச்சந்திரா சுவாமி திருக்கோயிலைச் சேர்ந்த யானை லட்சுமி, குழந்தைகள் மீது அதிக பாசம் கொண்டுள்ளது.

யானையின் அருகில் பாகன் குழந்தைகளைக் கொண்டுசென்றால் தும்பிக்கையால் குழந்தையை ஆரத்தழுவி மகிழ்ச்சியடைவதை நம்மால் காணமுடிகிறது. மேலும், பாகன் ரங்கனின் அன்பு கட்டளைக்கேற்ப தும்பிக்கையால் சலங்கைமணி அடித்தும் கம்பு சுழற்றியும் அசத்தியுள்ளது.

மேலும், இசையமைப்பாளர்களுக்கே டஃப் கொடுக்கும்விதமாக தனது தும்பிக்கையால் மவுத் ஆர்கன் வாசித்து, பார்வையாளர்களை வியக்கவைத்துள்ளது. லட்சுமி யானையின் இந்த அசாத்திய திறமை, நம்மை ஆச்சரியத்தில் திகைத்தவைக்கிறது.

இதையும் படிங்க: 'நாங்க கும்பலாக சுத்துவோம்...' - ஒட்டன்சத்திரம் பகுதியில் அலப்பறை செய்யும் காட்டு யானைகள்