கோவை பன்னிமடை அடுத்த கஸ்தூரி நாயக்கன் பாளையம் புதூர் பகுதியில் கடந்த மாதம் 25ஆம் தேதி 7 வயது சிறுமி கடத்தப்பட்டு பாலியல் வன்புணர்வு செய்து கொலை செய்யப்பட்ட சம்பவத்தில் சந்தோஷ் குமார் என்பவர் கைது செய்யப்பட்டு கோவை மத்தியச் சிறையில் அடைக்கப்பட்டுள்ளார்.
இந்நிலையில், அந்த சிறுமியின் வீட்டிற்கு மார்க்சிஸ்ட் கம்யூனிஸ்ட் கட்சியின் மாநிலச் செயலாளர் பாலகிருஷ்ணன் நேரில் சென்று சிறுமியின் பெற்றோர்களை சந்தித்து ஆறுதல் தெரிவித்தார்.
பின்னர் செய்தியாளர்களை சந்தித்து பேசிய அவர், "சிறுமியை வன்புணர்வு செய்து கொலை செய்யப்பட்ட சம்பவம் தமிழகத்தையே உலுக்கி உள்ளது.
கோவையில் கடந்த ஆறு மாதமாக குழந்தைகள், பெண்கள் மீதான பாலியல் வன்கொடுமைகள் அதிகரித்து வருகிறது. ஆனால் இதனை மாவட்ட நிர்வாக அரசு அலுவலர்கள் வேடிக்கை பார்க்கிறார்கள்.
பாலியல் வன்கொடுமை சம்பவங்களில் பயன்படுத்தப்படும் போதைப் பொருட்களின் விற்பனை அதிகரித்து வருகிறது. இதற்கு காவல் துறையினரின் அலட்சியமே காரணம். மேலும், காவல்துறை இவர்களுக்கு கைப்பாவையாகவும் மாறியுள்ளது.
சிறுமியின் வழக்கில் கைதான நபருடைய பாட்டியும் சம்பவம் நடந்த அன்றே உயிரிழந்துள்ளார். எனவே அந்த மூதாட்டியின் உடலில் பிரேத பரிசோதனை மேற்கொள்ள வேண்டும்.
இந்த சம்பவத்தில் தொடர்புடைய ஒருவரை மட்டும் கைது செய்து மற்றவர்களைக் காப்பாற்ற காவல் துறை முயல்கிறதோ என்ற சந்தேகம் எழுந்துள்ளது. எனவே, இவ்வழக்கில் தொடர்புடைய மற்றவர்களையும் கைது செய்யவேண்டும். மேலும், இவர்கள் மூன்று மாதங்களுக்குள் தண்டனை வழங்க வேண்டும்.
இவ்வழக்கில் கைது செய்யப்பட்ட நபர் மார்க்சிஸ்ட் கம்யூனிஸ்ட் கட்சியில் உள்ளதாக வதந்திகள் பரப்பப்பட்டு வருகின்றன. இது வழக்கை திசை திருப்பும் செயலாகும்.
பலியான சிறுமியின் குடும்பத்துக்கு தமிழ்நாட்டு அரசு இழப்பீடாக 1 கோடி ரூபாய் நிதி உதவியும், குடும்பத்தில் ஒருவருக்கு அரசு வேலையும் வழங்க வேண்டும்" எனத் தெரிவித்தார்.
