மார்க்சிஸ்ட் கம்யூனிஸ்ட் அரசியல் தலைமை குழு உறுப்பினர் பிருந்தா காரத், பொள்ளாச்சி மக்களவைத் தொகுதி திமுக வேட்பாளர் சண்முகசுந்தரத்தை ஆதரித்து, பொள்ளாச்சி திருவள்ளுவர் திடலில் பரப்புரை மேற்கொண்டார்.
அப்போது அவர் பேசியதாவது, “40 மக்களவைத் தொகுதிகள் மற்றும் 18 சட்டப்பேரவை இடைத்தேர்தலில் திமுக கூட்டணி வெற்றி பெற, கம்யூனிஸ்ட் கட்சி துணை நிற்கும். ஒரே கல்லில் இரண்டு மாங்காய் என்பதற்கேற்ப, இந்த தேர்தல் மூலம் மத்திய, மாநில அரசுகளுக்கு தக்க பாடம் புகட்ட முடியும்.
தமிழகத்தில் இருக்கும் பெரியதம்பி மற்றும் சின்னதம்பி ஆகியோரை தோற்கடிப்போம். மோடி அரசாங்கம் முஸ்லீம்களுக்கும், தலித்களுக்கும் மத்தியில் கடும் வன்முறையை ஏற்படுத்தி வருகிறது. மோடியின் ஆட்சியில் பணக்காரர்கள்தான் மேலும் பணக்காரர்களாக ஆகிறார்கள். ஏழை அப்படியே ஏழையாகவே தான் இருக்கிறார்கள்.
மோடி என்ன தாக்குதல் நடத்தினாலும் சரி, வாயில் பசையை போட்டு கொண்டு ஓபிஎஸ் மற்றும் ஈபிஎஸ் ஆகியோர் அமைதியாக இருக்கிறார்கள். 2014ல் மோடியா... அல்லது இந்த லேடியா என்று கர்ஜித்த ஜெயலலிதா எங்கே..? மோடிதான் டாடி என்று சொல்லும் ஒபிஎஸ் ஈபிஎஸ் எங்கே..?
பொள்ளாச்சியில் நடந்த பாலியல் சம்பவம் மிகுந்த வேதனையைத் தருகிறது. மோடி ஆட்சியில் ஒவ்வொரு மணி நேரமும் ஒரு பெண் பாலியல் தொல்லைக்கு உள்ளாக்கப்படுகிறார். இதில் 80% குற்றவாளிகள், பாஜக மற்றும் அதிமுக ஆட்சியால் எளிதில் விடுதலை ஆகிறார்கள். ஆளும் கட்சியினரின் தலையீட்டால்தான் பொள்ளாச்சி பாலியல் வழக்கில் பாதிக்கப்பட்ட பெண்ணின் பெயரை காவல்துறையினர் வெளியிட்டனர். ஆளும் கட்சியினர் பாலியல் குற்றவாளிகளுக்கு ஆதரவாக இருக்கின்றனர். ஜம்முவில் பாலியல் வன்கொடுமை செய்து கொல்லப்பட்ட சிறுமிக்கு நீதி கிடைக்காததற்கு முக்கிய காரணம், மத்தியில் இருக்கும் பாஜக ஆட்சிதான்” என உரையாற்றினார்.
