கோவை: கோவை மாவட்டம், காரமடை வனச்சரகத்தில் ஏராளமான யானைகள் உள்ளன. இந்த வனச்சரகத்தில் பில்லூர் அணை உள்ளிட்ட நீர்த்தேக்கங்கள் உள்ளதால், கோடை காலங்களில் வனவிலங்குகள் தண்ணீர் தேடி இப்பகுதி வருவது வழக்கம். அதன் காரணமாக யானைகள் உள்ளிட்ட விலங்குகளின் நடமாட்டம் அதிகமாக காணப்படும்.
இந்நிலையில் மேலூர் காப்புக்காட்டில், மானார் வனப்பகுதியில் காரமடை வனத்துறையினர் வழக்கமான ரோந்து பணியில் ஈடுபட்டிருந்தனர். அப்போது பவானி ஆற்றங்கரையில் குட்டி யானை ஒன்று உயிரிழந்து கிடப்பதைப் பார்த்தனர். இது குறித்து வனத்துறை உயர் அதிகாரிகளுக்கு தகவல் தெரிவித்தனர். அதன்படி, சம்பவ இடத்துக்கு சென்ற வனத்துறை மருத்துவர் சுகுமார் மற்றும் வனத்துறை அதிகாரிகள் விசாரணை மேற்கொண்டனர்.
அதில், உயிரிழந்தது நான்கு வயது மதிக்கத்தக்க பெண் யானை குட்டி என்பதும், அதன் வாயில் காயம் ஏற்பட்டிருப்பதும் தெரியவந்தது. இதனை அடுத்து மாவட்ட வன அலுவலர் ஜெயராஜ் சம்பவ இடத்தில் விசாரணை மேற்கொண்டார். அதன் பின்னர், யானைக் குட்டியின் உடல் பிரேத பரிசோதனை செய்யப்பட்டு, அங்கேயே தகனம் செய்யப்பட்டது. கோவை மாவட்டத்தில் கடந்த நான்கு மாதங்களில் பல்வேறு காரணங்களால் 10 யானைகள் உயிரிழந்துள்ளதாக சூழலியல் ஆர்வலர்கள் தகவல் தெரிவித்தனர்.
இதையும் படிங்க: கோவை அருகே பிறந்து ஒரு மாதமே ஆன குட்டி யானை உயிரிழப்பு
