சென்னை: ஒற்றை தலைமை விவகாரத்தில் கடந்த வருடம் ஜூலை 11 ஆம் தேதி நடைபெற்ற பொதுக்குழுவில் ஓபிஎஸ் மற்றும் அவரது ஆதரவாளர்கள் அதிமுகவிலிருந்து நீக்கம் செய்யப்பட்டனர். நீக்கம் செய்யப்பட்டதை எதிர்த்து சென்னை உயர்நீதிமன்றத்தில் ஓபிஎஸ் வழக்கு தொடுத்தார். அந்த வழக்கில் பொதுக்குழு செல்லும் என தீர்ப்பு வழங்கப்பட்டது. இந்த தீர்ப்பை எதிர்த்து உச்சநீதிமன்றத்தில் ஓபிஎஸ் மேல்முறையீடு செய்தார்.
உச்ச நீதிமன்றமும் பொதுக்குழு செல்லும் என்றும், தீர்மானங்கள் தொடர்பாக கிழமை நீதிமன்றங்களில் பார்த்துக் கொள்ளவும் என்றும் தீர்ப்பு வழங்கியது. பின்னர் உச்சநீதிமன்ற வழிகாட்டுதலின்படி சென்னை உயர்நீதிமன்ற உரிமையியல் நீதிமன்றத்தில் பொதுக்குழுவில் நிறைவேற்றப்பட்ட தீர்மானங்களுக்கு எதிராக வழக்கு தொடர்ந்தனர்.
இந்த நிலையில் பொதுச் செயலாளர் தேர்தல் மூலம் எடப்பாடி பழனிச்சாமி அதிமுகவின் பொதுச் செயலாளராக தேர்வு செய்யப்பட்டார். இந்த பொதுச்செயலாளர் தேர்தலை எதிர்த்து ஏற்கனவே நிலுவையில் உள்ள உரிமையியல் வழக்கில் ஒரு இடையீட்டு மனுவை ஓபிஎஸ் உட்பட 4 பேர் தாக்கல் செய்திருந்தனர். இதில் ஒரு நீதிபதி கொண்ட அமர்வு பொதுச்செயலாளர் தேர்தல் செல்லும் என தீர்ப்பு வழங்கினார்.
இதை எதிர்த்து இரண்டு நீதிபதிகள் கொண்ட அமர்வில் ஓபிஎஸ் உட்பட 4 பேர் மேல்முறையீடு செய்தனர். இந்த மேல்முறையீட்டு மனுவை விசாரித்த நீதிபதிகள் மகாதேவன், முகமது ஷஃபீக், "ஏற்கனவே உச்சநீதிமன்றம் பொதுக்குழு செல்லும் என தீர்ப்பு வழங்கியுள்ளது. இதன் அடிப்படையில் ஓபிஎஸ் உட்பட 4 பேர் தொடர்ந்த மேல்முறையீட்டு மனு தள்ளுபடி செய்யப்படுகிறது" என தீர்ப்பு வழங்கினர்.
ஆனால், இந்த தீர்ப்பு, இடையீட்டு மனு மீதான தீர்ப்பாகும். பொதுக்குழு தீர்மானங்கள் தொடர்பாக அசல் வழக்கு இன்னும் சென்னை உயர்நீதிமன்ற உரிமையியல் நீதிமன்றத்தில் நிலுவையில் உள்ளது. ஒற்றைத் தலைமை விவகாரம் தொடங்கியதில் இருந்து சுமார் 10க்கும் மேற்பட்ட தீர்ப்புகள் ஓபிஎஸ்க்கு பின்னடைவாகவும், ஈபிஎஸ்க்கு சாதகமாகவும் வந்துள்ளது.
பொதுக்குழு செல்லாது என ஒற்றை நீதிபதி ஜெயச்சந்திரன் வழங்கிய தீர்ப்பு மட்டுமே ஓபிஎஸ்க்கு சாதகமாக வந்தது. நேற்று (ஆக.25) வந்த தீர்ப்பு ஓபிஎஸ்க்கும் அதிமுகவிற்கும் சம்பந்தமில்லை என்பதை உறுதிப்படுத்தி இருக்கிறது. இது குறித்து பேசிய முன்னாள் முதலமைச்சர் ஓபிஎஸ், "தொண்டர்கள் மற்றும் நிர்வாகிகளுடன் ஆலோசனை செய்து அடுத்தக்கட்ட முடிவு எடுக்கப்படும்" என கூறியிருக்கிறார்.
தீர்ப்பு குறித்து பேசிய ஓபிஎஸ் தரப்பு ஆலோசகர் பண்ருட்டி ராமச்சந்திரன், "இந்த தீர்ப்பை எதிர்த்து உச்சநீதிமன்றத்தில் மேல்முறையீடு செய்யப்படும்" என கூறியிருக்கிறார். இது குறித்து பேசிய அதிமுகவின் பொது செயலாளர் எடப்பாடி பழனிச்சாமி, "நீதி, நேர்மை, தர்மம் வென்றுள்ளது. ஒரு சிலரை தவிர்த்து அங்கிருந்து அதிமுகவிற்கு வருவோர்களை நாங்கள் ஏற்றுக் கொள்வோம்" என கூறியிருக்கிறார்.
சட்டப் போராட்டத்தில் தொடர் பின்னடைவை சந்தித்த ஓபிஎஸ், தேர்தல் ஆணையத்திலும் பின்னடைவை சந்தித்துள்ளார். எடப்பாடி பழனிசாமியை தேர்தல் ஆணையம் பொதுச் செயலாளராக அங்கீகரித்துள்ளது. தொடர் பின்னடைவுகளை சந்தித்து வரும் ஓபிஎஸ்ஸின் அடுத்த கட்ட நகர்வு குறித்து கேள்வி எழுந்துள்ளது. அதாவது ஒற்றை தலைமை விவகாரம் தொடங்கியதில் இருந்து ஓபிஎஸ்-ன் ஆதரவாளர்கள் எடப்பாடி பழனிசாமி பக்கம் செல்ல தொடங்கினர்.
குறிப்பாக, அதிக அளவில் பொதுக்குழு உறுப்பினர்கள், அதிக அளவில் எம்எல்ஏக்கள், அதிக அளவில் கட்சி நிர்வாகிகள் எடப்பாடி பழனிசாமியின் பக்கம் உள்ளனர். அதிமுகவில் நீக்கப்பட்டது முதல் சட்டப்போராட்டத்தை மட்டுமே ஓபிஎஸ் நடத்தினார். மக்களிடம் சென்று ஓபிஎஸ் தரப்பில் இருக்கக்கூடிய நியாயங்களை எடுத்துச் சொல்ல தவறிவிட்டார் என கூறப்படுகிறது.
மேலும், 2017 ஆம் ஆண்டு ஓபிஎஸ் - ஈபிஎஸ் பிரிந்திருந்த போது அதை பாஜக இணைத்து வைத்தது. அதேபோன்று தற்போதும் அதிமுகவுடன் தன்னை பாஜக இணைத்து விடுவார்கள் என ஓபிஎஸ் முழுமையாக நம்பி இருந்தார். ஆனால், பாஜக பல அழுத்தங்கள் கொடுத்தும் எடப்பாடி பழனிசாமி ஓபிஎஸ்ஸை ஏற்க மறுத்துவிட்டார்.
பாஜக முழுமையாக ஓபிஎஸ்ஸை கைவிட்டது என கூறப்பட்டாலும், "அவர்களாக எங்களுடன் கூட்டணி இல்லை என அறிவிக்கும் வரை நாங்கள் பாஜகவுடன் தொடர்வோம்" என ஓபிஎஸ் தெரிவித்திருந்தார். பாஜகவை முழுமையாக நம்பி இருந்ததும் ஓபிஎஸ்-ன் பின்னடைவிற்கு காரணம் என சொல்லப்படுகிறது.
இது குறித்து பேசிய மூத்த பத்திரிகையாளர் தராசு ஷ்யாம், "நேற்று(ஆக.25) வந்த தீர்ப்பு ஓபிஎஸ்க்கு மிகப்பெரிய பின்னடைவு. ஏனென்றால், எடப்பாடி பழனிசாமி பொதுச் செயலாளராக தேர்வு செய்யப்பட்ட தேர்தல் தொடர்பான வழக்கின் மனுவை உயர்நீதிமன்றம் தள்ளுபடி செய்துள்ளது. இன்னும் உரிமையில் நீதிமன்றத்தில் அசல் வழக்கு உள்ளது. இருந்தாலும் அதற்கு பல ஆண்டுகள் ஆனாலும் தீர்ப்பு வருமா என சந்தேகம்தான்.
நான் தான் பொதுச் செயலாளர் என சசிகலா தொடர்ந்த உரிமையியல் வழக்கு இன்னும் நிலுவையில் உள்ளது. அதேபோன்ற வழக்கு தான் ஓபிஎஸ் தொடுத்த உரிமையியல் வழக்கு. உட்கட்சி பிரச்சினையை நீதிமன்றங்கள் மூலம் தீர்த்ததாக வரலாறே கிடையாது. தொடர்ந்து சட்ட போராட்டத்தை மேற்கொண்ட ஓபிஎஸ், மக்கள் போராட்டத்தை முன்னெடுக்க தவறிவிட்டார்.
மேலும் சட்டப்போராட்டம் மேற்கொண்டால் நேரம் தான் வீணாகும். தனக்கான பின்னடைவை எங்கு சந்தித்தோம் என ஓபிஎஸ் தரப்பினர் ஆராய வேண்டும். வரவிருக்கும் நாடாளுமன்ற தேர்தலுக்கு தயாராகுவதே ஓபிஎஸ்சிற்கு சிறந்ததாக இருக்கும். அப்படி தேர்தலில் குறிப்பிட்ட சதவீத வாக்கு வாங்கும் பொழுது அதிமுக ஒன்றிணைய வாய்ப்புள்ளது" என தெரிவித்தார்.
இதையும் படிங்க: Aiadmk Case: பொதுக்குழு வழக்கில் ஈபிஎஸ் மீண்டும் வெற்றி.. தீர்ப்பின் முழு விபரம், ஓபிஎஸ் பதில் என்ன?
