மின்கம்பம் சாய்ந்து கால் இழந்த ஜூடோ வீரருக்கு அரசு வேலை வழங்குக - விஜயகாந்த் வலியுறுத்தல்!

மதுரையில் மின்கம்பம் சாய்ந்து கால் இழந்த ஜூடோ வீரர் விக்னேஸ்வரனுக்கு அரசு வேலை வழங்க வேண்டும் என தேமுதிக தலைவர் விஜயகாந்த் அறிக்கை வெளியிட்டுள்ளார்.

சென்னை: மதுரை கோச்சடை பகுதியில் ஜூடோ விரர் விக்னேஸ்வரன் மாலையில் வீடு திரும்பும்போது அப்பகுதியில் பழைய மின் கம்பங்களை அகற்றும் பணிகளை மின்வாரிய அதிகாரிகள் கிரேன் மூலம் மேற்கொண்டிருந்தனர். மின் கம்பம் கட்டப்பட்டிருந்த கம்பி வலுவில்லாமல் இருந்ததால் அது அறுந்து அதன் கம்பம் விக்னேஸின் காலில் விழுந்துள்ளது.

உடனடியாக, அவர் மதுரை அரசு ராஜாஜி மருத்துவமனையில் அனுமதிக்கப்பட்டு சிகிச்சை பெற்று வருகிறார். இந்த விபத்தில் அவரது இடது கணுக்கால் பகுதி முழுமையாக நொறுங்கியதால், அவருடைய கணுக்கால் பகுதி அகற்றப்பட்டுள்ளது. இதற்கு பல்வேறு தரப்பினர் கண்டனம் தெரிவித்துள்ளனர்.

இந்த நிலையில், மின்வாரியத்தின் அலட்சியத்தால கால் இழந்ததாக ஜூடோ வீரர் விக்னேஸ்வரனுக்கு அரசு வேலையும், உரிய நிவாரணமும் வழங்க வேண்டி தேசிய முற்போக்கு திராவிட கழக நிறுவனத் தலைவரும், பொதுச் செயலாளருமான விஜயகாந்த் நேற்று (ஜூலை 28) அறிக்கை வெளியிட்டுள்ளார்.

மேலும் இது தொடர்பாக தேமுதிக வெளியிட்டுள்ள அறிக்கையில், "கோச்சடை பகுதியைச் சேர்ந்த கல்லூரி மாணவரான விக்னேஸ்வரன் பல்வேறு ஜூடோ போட்டிகளில் கலந்து கொண்டு பதக்கங்களை வென்றுள்ளார். அடுத்த மாதம் மாநில அளவில் நடைபெறும் ஜூடோ போட்டியில் கலந்து கொள்வதற்காக பயிற்சி மேற்கொண்டு வந்த நிலையில், கோச்சடை பகுதியில் சாலையில் சென்று கொண்டிருந்த விக்னேஸ்வரன் மீது மின்கம்பம் திடீரென விழுந்ததில் மாணவனின் இடது கணுக்கால் முறிந்தது.

மேலும், மின்கம்பம் மாற்றும் பணியின்போது அறிவிப்பு பலகை வைக்காமலும், முன்னெச்சரிக்கை மற்றும் பாதுகாப்பு நடைமுறையைப் பின்பற்றாமலும், மின்வாரிய அதிகாரிகள் மிகவும் அலட்சியமாக நடந்து கொண்டதே ஜூடோ வீரர் விக்னேஸ்வரனின் கால் முறிவுக்கு காரணம் என சொல்லப்படுகிறது.

இந்த நிலையில் இன்னும் ஓரிரு வாரங்களில் நடைபெறும் ஜூடோ போட்டிக்கான தேசிய போட்டியில் கலந்து கொள்ள தயாராக இருந்த மாணவர் விக்னேஸ்வரனின் எதிர்கால வாழ்க்கை மின் வாரியத் துறையின் அலட்சியமான பணியால் கால் துண்டாகி தற்போது கேள்வி குறியாகிவிட்டது.

மேலும், விளையாட்டுத் துறையில் பல்வேறு சாதனைகளை செய்து காவலாரக வேண்டும் என்ற மாணவரின் கனவு கானல் நீராகி விட்டது. மாணவர் விக்னேஸ்வரனுக்கு தமிழ்நாடு அரசு உரிய நிவாரணமும், அரசு வேலையும் வழங்க வேண்டும். மேலும், கவனக்குறைவாக செயல்பட்டு மாணவரின் கால் பறிபோக காரணமாக இருந்த மின்வாரிய அதிகாரிகள் பணியிடை நீக்கம் செய்யப்பட வேண்டும். எதிர்காலத்தில் இது போன்ற சம்பவங்கள் மீண்டும் நடைபெறாமல் இருப்பதை உறுதி செய்ய வேண்டும்” என தெரிவிக்கப்பட்டுள்ளது.

இதையும் படிங்க: என்எல்சி விவகாரம்: பொது அமைதிக்கு குந்தகம் விளைவித்தால் கடும் நடவடிக்கை - அமைச்சர் தங்கம் தென்னரசு