கோவிட்-19 வைரஸ் தொற்று கடந்தாண்டு இறுதியில் சீனாவில் பரவத்தொடங்கியது. இந்த வைரஸ் தொற்றால் இதுவரை லட்சக்கணக்கானோர் பாதிக்கப்பட்டுள்ளனர். சீனாவில் இந்த வைரஸ் தொற்று குறைகின்றபோதும், மற்ற நாடுகளில் இந்த வைரஸ் தொற்றின் தாக்கம் நாளுக்குநாள் அதிகரித்துவருகிறது.
இந்நிலையில், கரோனா அச்சம் காரணமாக, போதிய பயணிகள் இல்லாமல் சென்னை விமான நிலையம் வெறிச்சோடிக் காணப்படுகிறது. உதாரணமாக, 178 போ் பயணம் செய்யும் வசதியுடைய ஏா்பஸ் விமானம் 20-க்கும் குறைவான பயணிகளுடன் இயக்கப்படுகிறது. இதனால், இன்று மட்டும் 224 விமானங்களின் சேவை ரத்துசெய்யப்பட்டுள்ளது. டெல்லி, மும்பை, கொச்சி ஆகிய பெருநகரங்களுக்குச் செல்லும் விமானங்களும் இதைப்போல் இயக்கப்படுகின்றன.
இதனிடையே, வரும் நள்ளிரவு 12 மணியிலிருந்து, மார்ச் 29ஆம் தேதி வரை சா்வதேச விமானங்கள் இந்தியாவிற்கு வந்து செல்ல மத்திய அரசு இடைக்காலத் தடைவிதித்துள்ளது.
ரத்துசெய்யப்பட்ட விமானங்கள்
மலேசியா, இலங்கை, தாய்லாந்து, துபாய், மஸ்கட், தோகா, குவைத், பக்ரைன், ஜெட்டா, ஹாங்காங், ஜொ்மன் உள்ளிட்ட பல்வேறு நாடுகளிலிருந்து சென்னைக்கு வரவேண்டிய 42 விமானங்களும், அதைப்போல் சென்னையிலிருந்து அந்த நாடுகளுக்குச் செல்ல வேண்டிய 42 விமானங்களுமாக மொத்தம் 84 சா்வதேச விமானங்களின் சேவையும் ரத்துசெய்யப்பட்டுள்ளன.
சென்னையிலிருந்து டெல்லி, மும்பை, பெங்களூரு, ஹைதராபாத், கொச்சி, திருவனந்தபுரம், தூத்துக்குடி, மதுரை, திருச்சி, கோவை உள்ளிட்ட பல்வேறு நகரங்களுக்குச் செல்லவேண்டிய 70 விமானங்களும், அதைப்போல் அந்த நகரங்களிலிருந்து சென்னைக்கு வரவேண்டிய 70 விமானங்களும் மொத்தம் 140 உள்நாட்டு விமானங்களின் சேவையும் ரத்துசெய்யப்பட்டுள்ளது.
இதையும் படிங்க: கரோனா: மருத்துவம் பெற்றுவந்த மூதாட்டி தப்பி ஓட்டம்!
