சென்னை: மவுண்ட் ரோடு முகமது ஹுசைன் சாஹிப் தெருவில் செல்போன் உதிரிபாகங்கள் விற்பனை செய்யும் கடை நடத்திவருபவர் ஜதேஷ் (31). கடந்த ஜனவரி 13ஆம் தேதி இரவு வழக்கம்போல் கடையை மூடிவிட்டு ஜதேஷ் வீட்டிற்குச் சென்றார். பின்பு அடுத்த நாள் காலை கடையின் பூட்டு உடைக்கப்பட்டிருப்பதாக பக்கத்து கடைக்காரர் ஜதேஷிக்கு தகவல் தெரிவித்துள்ளார். இதையடுத்து கடைக்கு விரைந்த ஜதேஷ் கல்லாப்பெட்டியைப் பார்த்தபோது அதில் வைத்திருந்த நான்கு லட்சம் ரூபாய், மூன்று செல்போன்கள் திருடுபோயிருந்தது தெரியவந்தது. அதிர்ச்சியடைந்த அவர், இது குறித்து சிந்தாதிரிப்பேட்டை காவல் நிலையத்தில் புகார் அளித்தார்.
புகாரின்பேரில் சிந்தாதிரிப்பேட்டை காவல் துறையினர் வழக்குப்பதிவு செய்து கடையருகே பொருத்தப்பட்டிருந்த சிசிடிவி கேமரா காட்சிகளை ஆய்வுசெய்தனர். அதில், இருவர் கடப்பாரையைக் கொண்டு கடையின் ஷட்டரை உடைத்து பணத்தைக் கொள்ளையடித்துச் செல்வது பதிவாகியிருந்தது.
சிசிடிவியில் சிக்கிய திருடர்கள்
இதையடுத்து சிசிடிவியில் பதிவான நடைபாவனை காட்சிகளை வைத்து பழைய குற்றவாளிகளின் புகைப்படத்துடன் ஒப்பிட்டுப் பார்த்தபோது, வேறு வழக்கின் குற்றவாளிகள் வினோத், நாகராஜ் என்பது தெரியவந்தது. மேலும் கொள்ளைச் சம்பவம் நடந்த நேரத்தில் அப்பகுதியில் பயன்படுத்தப்பட்ட செல்போன் எண் அழைப்புகளை ஆய்வு செய்தபோது வினோத், நாகராஜ் கொள்ளையில் ஈடுபட்டதை காவல் துறையினர் உறுதிசெய்தனர்.
இதனையடுத்து அவர்கள் சென்ற சிசிடிவி காட்சிகளை வைத்து சிந்தாதிரிப்பேட்டையில் பதுங்கி இருந்த வினோத் (19), நாகராஜ் என்கிற பாம்பு நாகராஜை இன்று (ஜனவரி 15) காவல் துறையினர் கைதுசெய்தனர். இவர்களிடமிருந்த மூன்று லட்சத்து 80 ஆயிரம் ரூபாயைப் பறிமுதல்செய்தனர்.
மேலும் இவர்களிடம் நடத்திய விசாரணையில், கடந்த சில வாரங்களுக்கு முன்பு வினோத், நாகராஜ் ஆகியோர் பிணையில் வெளியே வந்ததும், கஞ்சா, போதைக்கு அடிமையான இவர்கள் பணப்பற்றாக்குறை ஏற்பட்டால் கடையை நோட்டமிட்டு ஷட்டரை உடைத்து பணத்தை கொள்ளையடிப்பதை வாடிக்கையாக வைத்திருப்பதும் தெரியவந்தது.
குறிப்பாக வினோத் கொள்ளையடிக்கச் செல்லும்போது டிப்டாப்பாக தொப்பி, ஜீன்ஸ் பேண்ட், டி-சர்ட் அணிந்துசெல்வதை வாடிக்கையாக வைத்துள்ளார். காவல் துறையினர் பிடித்தால் டி-சர்டை கழற்றி எளிதாகத் தப்பிச்செல்ல உதவுவதாக விசாரணையில் தெரிவித்துள்ளார்.
பல வழக்குகள் நிலுவை
மேலும் கம்பியை வைத்து ஷட்டரை உடைத்து கொள்ளையில் ஈடுபட்டுவந்த வினோத், சிறையில் அடைக்கப்பட்டபோது கடப்பாரை பயன்படுத்தி திருட கற்றுக்கொண்டதாகத் தெரிவித்துள்ளார். கொள்ளையடித்த பணத்தில் கஞ்சா, உணவு, உல்லாச வாழ்க்கை வாழ்வதை இருவரும் வாடிக்கையாக வைத்துள்ளனர் என்பதும் தெரியவந்துள்ளது.
ஏற்கனவே பல காவல் நிலையங்களில் வினோத் மீது திருட்டு, கொள்ளை, அடிதடி உள்பட 13 வழக்குகள் நிலுவையில் இருப்பதும், பாம்பு நாகராஜ் மீது ஏழு வழக்குகள் நிலுவையில் இருப்பதும் விசாரணையில் தெரியவந்தது. இதனையடுத்து வினோத், நாகராஜ் இருவரையும் காவல் துறையினர் நீதிமன்றத்தில் ஆஜர்படுத்தி சிறையில் அடைத்தனர்.
இதையும் படிங்க: முட்டி மோதும் மூவர்... அதிமுக மேயர் வேட்பாளர் யார்?
