நாடு முழுவதும் கரோனா பாதிப்பு மீண்டும் அதிகரித்து வரும் நிலையில், அண்மையில் தமிழ்நாடு அரசு பல்வேறு புதிய கட்டுப்பாடுகளை அறிவித்தது. பொழுதுபோக்கு தளங்கள், கடைவீதிகள், பேருந்து போன்றவற்றில் அதிக அளவில் மக்கள் அதிக அளவு கூட தடை விதிக்கப்பட்டுள்ளது. தொடர்ந்து மக்கள் அனைவரும் கட்டாயம் முகக்கவசம் அணிய வேண்டும் என்றும், மீறுபவர்களுக்கு 200 ரூபாய் அபராதம் விதிக்கப்படும் என்றும் எச்சரிக்கப்பட்டிருந்தது.
இதனையடுத்து, சென்னை மெட்ரோ ரயில் நிலையங்கள், ரயில்களுக்குள் பயணிகள் அனைவரும் கட்டாயம் முகக்கவசம் அணிய வேண்டும் என சென்னை மெட்ரோ ரயில் நிர்வாக அறிவித்தது. இதனை மீறுபவர்களிடமிருந்து மெட்ரோ ரயில் நிர்வாகம் அபராதம் வசூலிக்கின்றனர். ஆனால் அதனை சற்றும் பொருட்படுத்தாமல் மக்கள் மெட்ரோ ரயில்நிலைய நுழைவு வாயிலில் மட்டும் முகக்கவசம் அணிந்துவிட்டு, அதன்பின் அதனை கழற்றுவிடுவது அல்லது முறையாக அணியாமல் செல்கின்றனர்.
இந்நிலையில் இதனைத்தடுக்கும் வகையில், ரயில்நிலைய வளாகத்தில் கரோனா தொற்று விதிகளை மீறுபவர்களை கண்காணித்து அபராதம் விதிக்க 10 கண்காணிப்புக் குழுக்கள் அமைக்கப்பட்டுள்ளது. இவை முகக்கவசம் இல்லாமல் செல்பவர்களை கடுமையாக கண்காணித்து அபராதம் விதிக்கின்றனர். மேலும், ரயில் பெட்டிகளுக்கும் பயணிகள் முகக்கவசம், தகுந்த இடைவெளியை கடைபிடிக்கின்றனரா? என்பதை உறுதி செய்ய சிசிடிவி கேமராக்கள் மூலம் கண்காணித்து அபராதம் வசூலிக்கின்றனர்.
அனைத்து மெட்ரோ ரயில்களையும், அதன் பயணிகளையும் மெட்ரோ ரயில் தலைமையக கட்டுப்பாட்டு அறையிலிருந்து கண்காணிக்க முடியும் என்பது குறிப்பிடத்தக்கது.
இதையும் படிங்க: உதவி ஆய்வாளருக்கு கரோனா: பல்லாவரம் காவல் நிலையத்தில் கிருமி நாசினி தெளிப்பு
