திருவேற்காடு, நடேசன் நகரை சேர்ந்தவர் வாசுதேவன்(49). இவர் சொந்தமாக டிராக்டர் வைத்துக்கொண்டு திருவேற்காடு மற்றும் அதன் சுற்றுப்புற பகுதிகளில் உள்ள வீடுகளுக்கு தண்ணீர் சப்ளை செய்து வருகிறார்.
இந்த நிலையில், நேற்று முன்தினம் இரவு டிராக்டரை வீட்டின் அருகில் உள்ள காலி இடத்தில் நிறுத்திவிட்டு சென்றுள்ளார். மீண்டும் காலை எழுந்துவந்து பார்த்தபோது அங்கு டிராக்டரை இல்லாததை கண்டு அதிர்ச்சி அடைத்தார்.
இதுகுறித்து திருவேற்காடு காவல்நிலையத்தில் அளித்த புகாரின் அடிப்படையில், சம்பவ இடத்திற்கு வந்து காவல் துறையினர் அந்த பகுதியில் உள்ள கண்காணிப்பு கேமராக்களை ஆய்வு செய்தனர்.
இதில், இரவு நேரத்தில் காரிலிருந்து ஒருவர் இறங்கி சென்று தனியாக நிறுத்தி வைக்கப்பட்டிந்த டிராக்டரை கள்ள சாவி போட்டு ஓட்டி செல்வதும் அதன்பிறகு மற்றொரு நபர் காரில் பின் தொடர்ந்து செல்வது போல் காட்சிகள் பதிவாகி இருந்தது.
அந்த காரின் நம்பரை வைத்து காவல்துறையினர் விசாரணை மேற்கொண்டதில், திருவேற்காடு காமதேனு நகரை சேர்ந்த ஐயப்பன் (41), விக்னேஷ்(21), ஆகியோர் டிராக்டரை திருடிச்சென்றது தெரியவந்தது. பின்னர், இருவரையும் பிடித்து விசாரித்ததில் டிராக்டரை திருடிச்சென்றதை ஒப்புக்கொண்டனர். தொடர்ந்து, ஐயப்பனையும், விக்னேஷையும் கைது செய்த காவல்துறையினர் இதுபோன்று வேறு எதாவது திருட்டு சம்பவத்தில் ஈடுபட்டுள்ளார்களா என்ற கோணத்தில் விசாரணை மேற்கொண்டு வருகின்றனர்.
