முருகனின் 4ஆம் படை வீடான சுவாமிமலை ஸ்ரீ ஸ்வாமிநாத ஸ்வாமி கோயிலில் ஆண்டுதோறும் திருக்கார்த்திகை திருவிழா கோலாகலமாக நடைபெறுவது வழக்கம்.
அந்த வகையில், இந்த ஆண்டுக்கான விழா கொடியேற்றத்துடன் தொடங்கியது. முன்னதாக சுப்ரமணிய ஸ்வாமி பரிவாரங்களுடன் மலைக்கோயிலில் இருந்து உற்சவ மண்டபத்தில் எழுந்தருளினார். பின்னர் கொடிமரத்திற்கு பால், தயிர், சந்தனம், மஞ்சள், திரவியப்பொடி உள்ளிட்ட வாசனை திரவியங்களால் அபிஷேகம் நடைபெற்றது. தொடர்ந்து கஜ உருவம் பொறிக்கப்பட்ட கொடி ஏற்றப்பட்டது.
தொடர்ந்து கொடிமரத்திற்கு சிறப்பு தீபாராதணை நடைபெற்றது. இதில் ஏராளமான பக்தர்கள் கலந்து கொண்டு வழிபட்டனர். இதனிடையே 3ஆவது சோம வாரத்தையொட்டி, திருபுவனத்திலிந்து பெண்கள் உள்பட ஆயிரக்கணக்கான பக்தர்கள் கொட்டிய மழையிலும் காவடி மற்றும் பால் காவடி சுமந்து பாதயாத்திரையாக சென்று ஸ்ரீ ஸ்வாமிநாத ஸ்வாமிக்கு அபிஷேகம் செய்தனர்.
திருக்கார்த்திகை விழாவையொட்டி சுப்ரமணிய ஸ்வாமி நாள்தோறும் பல்வேறு வாகனங்களில் திருவீதி உலாவும், விழாவின் முக்கிய நிகழ்ச்சியான திருத்தேர் மற்றும் தீபக்காட்சி வரும் 10ஆம் தேதியும் நடைபெற உள்ளது. தொடர்ந்து, வரும் 11ஆம் தேதி காவிரிக் கரையில் தீர்த்தவாரியுடன் திருக்கார்த்திகை திருவிழா நிறைவடைகிறது.
