தமிழ்நாட்டில் வேகமாகப் பரவி வரும் கரோனா நோய்த் தொற்றினைக் கட்டுப்படுத்திட, தமிழ்நாடு அரசு பல்வேறு முன்னெச்சரிக்கை நடவடிக்கைகளை மேற்கொண்டு வருகிறது. எனினும் கரோனா தொற்றின் இரண்டாவது அலையில் பாதிப்புக்குள்ளாகும் நோயாளிகளுக்கு அவசியமான மருத்துவ ஆக்சிஜன் கிடைப்பதில் தற்போது தட்டுப்பாடு ஏற்பட்டுள்ளது.
இதனைக் கருத்தில்கொண்டு, முன்னதாக மருத்துவ ஆக்சிஜன் உற்பத்தியில் தமிழ்நாடு தற்சார்பு அடைவதற்கான வழிமுறைகள் குறித்து முதலமைச்சர் மு.க.ஸ்டாலின் மே 11ஆம் தேதி விரிவான ஆலோசனைக் கூட்டத்தை நடத்தினார். அதன் அடிப்படையில், தமிழ்நாட்டின் தொழிற்சாலைகளில் உற்பத்தி செய்யப்படும் ஆக்சிஜனை மருத்துவமனைகளுக்கு வழங்குவதை முறைப்படுத்த தற்போது குழு ஒன்று அமைக்கப்பட்டுள்ளது.
இதற்காக தொழில்துறை செயலர் முருகானந்தம் தலைமையில் நான்கு பேர் கொண்ட குழு அமைக்கப்பட்டுள்ளதாக அரசு சார்பில் தெரிவிக்கப்பட்டுள்ளது.
மேலும், தொழிற்சாலைகளில் உற்பத்தி ஆகும் ஆக்சிஜனை எந்த மருத்துவமனைக்கு எவ்வளவு ஒதுக்கீடு செய்வது என்பது குறித்து இக்குழு முடிவு செய்து பகிர்ந்தளிக்கும் எனவும் தெரிவிக்கப்பட்டுள்ளது.
இதையும் படிங்க: மருத்துவ ஆக்சிஜன் உற்பத்தியாளர்களுக்கு சிறப்பு சலுகைகள் அறிவிப்பு
